مه‌سرور بارزانى سه‌رۆكێ حكومه‌تا هه‌رێما كوردستانێ دپۆسته‌كیدا ل سه‌ر ئه‌كاونتێ خوه یێن ئێكس ( تویته‌رێ پێشتر ) ڕاگه‌هاند، ئه‌وان دكۆمبوونا خوه‌دا دگه‌ل به‌رپرسێن وه‌زاره‌تا ده‌رڤه یا ئه‌مریكا، داخوازا پشته‌ڤانییا به‌رده‌وام یا ئه‌مریكا ل سیسته‌مێ فیدرالیزم و مافێن ده‌ستوورییێن هه‌رێما كوردستانێ كر.
سه‌رۆكوه‌زیران مه‌سرور بارزانى ئاماژه ب هندێ ژى دا، ئه‌وان دگه‌ل هه‌ڤپشكێن خوه ل وه‌زاره‌تا ده‌رڤه یا ئه‌مریكا به‌حسى په‌یوه‌ندییێن هه‌ولێر و به‌غدا كر، هه‌روه‌سا داخوازا پشته‌ڤانییا به‌رده‌وام یا ئه‌مریكا ل سیسته‌مێ فیدرالى و مافێن خه‌لكێ هه‌رێما كوردستانێ كر.
هه‌روه‌سا دیاركر، ئه‌وان دگه‌ل به‌رپرسێن وه‌زاره‌تا ده‌رڤه یا ئه‌مریكا به‌حسى ڕێیێن ده‌ستپێكرنا هنارتنا په‌ترۆلا هه‌رێما كوردستانێ كر.
سه‌باره‌ت شنگالێ ژى سه‌رۆكوه‌زیران ئاشكراكر، هه‌لویستێ وان یێ ڕوونه، پشتى 10 سالان ژ جینۆسایدێ، پێدڤییه ڕێككه‌ڤتنا شنگالێ بهێته بجهئینان، داكو ئێزدى ڤه‌گه‌رنه جهێن باب و باپیرێن خوه، ئه‌و دێ ل سه‌ر به‌رگریگرنێ ژ مافێن هه‌موو پێكهاته‌یان دبه‌رده‌وامبن و دێ وه‌كو په‌ناگه‌هه‌ك بۆ ئاواره‌یان مینن.
