سه‌رۆكێ حكومه‌تا هه‌رێما كوردستانێ په‌یامه‌ك د سالڤه‌گه‌را سه‌رهلدانا گه‌لێ كوردستانێدا به‌لاڤكر و ڕاگه‌هاند، بلا بیره‌وه‌رییا سه‌رهلدانێ پالده‌ره‌كێ زێده‌تر بیت بۆ پشته‌ڤانیكرنا قه‌واره‌یێ ده‌ستوورییێ هه‌رێمێ و حكومه‌تا هه‌رێما كوردستانێ، داكو بشێن ب باشترین شێوه خزمه‌ته‌كا ژهه‌ژیتر پێشكێشى هه‌موو خه‌لكێ كوردستانێ بكه‌ن.
مه‌سرور بارزانى سه‌رۆكێ حكومه‌تا هه‌رێما كوردستانێ په‌یامه‌ك ل سالڤه‌گه‌را سه‌رهلدانا گه‌لێ كوردستانێ به‌لاڤكر و گوت: ل 33ێ سالییا سه‌رهلدانا شكۆدارا سالا 1991ێ یا گه‌لێ كوردستانێ، گه‌رمترین پیرۆزباهییان ل خه‌لكێ كوردستانێ و پێشمه‌رگه‌یێن قاره‌مان و بنه‌مالێن سه‌ربلندێن شه‌هیدان دكه‌ت، ڕێز و پێزانین بۆ هه‌موو تێكوشه‌ر و كوردستانپه‌روه‌ران و پشكدارێن سه‌رهلدانێ، بۆ هه‌موو ئه‌وێن دكاروانێ ئازادى و سه‌رفه‌رازى و پێشكه‌ڤتن و ئاڤه‌دانی و خۆراگرییا كوردستانێدا زه‌حمه‌ت كێشاى، سلاڤ بۆ گیانێ ئه‌وان شه‌هیدان بیت یێن دڤێ ڕێدا گیانێ خوه كرییه قۆربانى.
سه‌رۆكێ حكومه‌تێ ڕاگه‌هاند ژى، سه‌رهلدانا ئادارا 1991ێ، ئێك ژ گرنگترین ڕوودانێن به‌رهه‌مدارێن مێژوویێ و كوردستانێ بوو و شانازییه‌كا مه‌زن و سه‌روه‌رییه‌كا مه‌زنا گه‌لێ كوردستانێیه، كو به‌رهه‌مێ ئێكرێزى و ئێكگرتنا هه‌موو ته‌خ و چین و پێكهاته‌یێن گه‌لێ كوردستانێ و هێز و لایه‌نێن كوردستانێ بوو، ڕه‌تكرنا ب ئێكجارییا سته‌م و داگیركه‌رى و بن ده‌ستییێ بوو، به‌رهه‌مێ وێ دروستبوونا قه‌واره‌یێ فیدرالییێ هه‌رێما كورستانێ و دامه‌زراوه‌یێن شه‌رعى و ده‌ستوورییێن هه‌رێمێ بوو.
مه‌سرور بارزانى ئاماژه ب هندێ ژى دا، ئه‌ڤرۆ كو ئه‌و سه‌رهلدانێ ل بیر دئینن، گه‌له‌ك یا گرنگ و پێدڤییه هه‌موو لایه‌ن و پێكهاته و هه‌ر تاكه‌كێ كوردستانێ، ب ئێك ڕێزى و ئێك ده‌نگییێ، داكۆكییێ ل ده‌ستكه‌ڤتێن نیشتیمانى و مافێن ده‌ستوورییێن گه‌لێ كوردستانێ بكه‌ن، له‌وما پێدڤییه قه‌واره‌یێ فیدرالییێ هه‌رێما كوردستانێ و بهایێن بلندێن سه‌رهلدانێ و بنه‌مایێن پێكڤه‌ژیانا ئاشتییانه و ئاشتیخواز و مرۆڤ دۆستییا گه‌لێ كوردستانێ هه‌رده‌م ب پارێزن و پێشبێخین، چ پێنه‌ڤێت سه‌روه‌رییا هه‌موویان گرێداى هه‌بوونا كوردستانێیه.
سه‌رۆكێ حكومه‌تا هه‌رێما كورستانێ دپه‌یاما خوه‌دا دیار ژى كر، بلا بیره‌وه‌رییا سه‌رهلدانێ، پالده‌ره‌كێ زێده‌تر بیت بۆ وان، داكو پشته‌ڤانییا قه‌واره‌یێ ده‌ستوورییێ هه‌رێمێ و حكومه‌تا هه‌رێما كوردستانێ بكه‌ن، بشێن ب باشترین شێوه خزمه‌ته‌كا ژ هه‌ژیتر پێشكێشى هه‌موو خه‌لكێ كوردستانێ بكه‌ن، پێكڤه هه‌رێما كوردستانێ به‌ره‌ڤ قووناغه‌كا گه‌شتر ببه‌ن، بلند و شكۆدار بیت سالیادا سه‌رهلدانا ئادارا 1991ێ، سه‌رێ ڕێز و نه‌وازشێ بۆ شه‌هیدێن سه‌رهلدانێ و هه‌موو شه‌هیدێن كوردستانێ د چه‌مینن.
