سه‌رۆكوه‌زیرێن عیراقێ پێشوازی ل سه‌رۆك و ئه‌ندامێن فراكسیۆنا پارتی دیموكراتی كوردستان ل په‌رله‌مانێ عیراقێ کر و د كۆمبوونه‌‌كێدا گۆتوبێژ ل سەر پرس و بابه‌تێن په‌یوه‌ندیدار یێن دناڤبەرا حكومه‌تا فیدڕاڵی و حكومه‌تا هه‌رێما كوردستانێ دا كر.
فراكسیۆنا پارتی دیموكراتی كوردستان ل په‌رله‌مانێ عیراقێ د چوارچووڤەیێ ڕاگەهاندنەکێدا ئاماژە کریە، سه‌رۆكوه‌زیرێن عیراقێ محه‌مه‌د شیاع سوودانی، پێشوازی ل سه‌رۆك و ئه‌ندامێن فراكسیۆنا پارتی دیموكراتی كوردستان کر و چه‌ند ته‌وه‌رێێن گرنگ گۆتوبێژکرن، کو پێکهاتبوون ژ:
ئێک: په‌یوه‌ندییێن دناڤبەرا حكومه‌تا هه‌رێما كوردستانێ و حكومه‌تا ئیتیحادی دا ب شێوه‌یه‌كێ گشتی و دووپاتیکرن ل سەر پێگیربوونا کو ڕێککەفتن ل سەر هاتیە کرن، کو د گرێداینە ب بەرژەوەندییێن هەرێما کوردستانێ ڤە.
دوو: بابه‌تێ بودجه و مووچه‌یێ مووچه‌خۆرێن هه‌رێما كوردستانێ و بڕیارێن دادگەها فیدراڵی یێن تایبه‌ت ب مووچه‌یێ فه‌رمانبه‌رێن هه‌رێما كوردستانێ ڤە، كو د هەڤتەریب نینن د‌گه‌ل ده‌ستووری، هه‌روه‌سا پشكا هه‌رێما كوردستانێ د بودجه‌یا گشتی یا عیراقێ دا.
سێ: دووپاتکرن ل سه‌ر پۆست و شایستەیێن هه‌رێما كوردستانێ د پۆستێن سه‌ربازی و ئه‌منی دا، دناڤ وان ژی دا ده‌زگەهێ ئاسایشا نیشتمانی و پاراستن و بەرهەنگاربوونا تیرۆرێ و بریكارێن وه‌زاره‌تان و ده‌ستەیێن سه‌ربه‌خۆ.
چوار: دووپاتکرن ل سه‌ر په‌سه‌ندكرنا ئه‌وان یاسایێن گرنگ كو د كارنامه‌یا كابینه‌یا سوودانی دا هاتینە و ره‌وانه‌كرنا وان بۆ په‌رله‌مانێ عیراقێ، ژ وانژی یاسایا فیدراڵی و جڤاتا فیدراڵی.
پێنج: ل به‌رچاڤگرتنا پشكا پارتی دیموكراتی كوردستان د ناڤ جڤاتا نوونەران دا وەک مەزنترین فراكسیۆنا كوردستانی.
شه‌ش: شایسته‌یێن هه‌رێما كوردستانێ ژ ده‌رمان و چاره‌سه‌رییێن تایبه‌ت ب وه‌زاره‌تا ساخلەمییێ یا هه‌رێما كوردستانێ ڤە.
حه‌فت: زێدەکرنا ئەوێن کو تۆرا چاڤدێرییا جڤاکی ل هەرێما کوردستانێ ڤەدگریت، هه‌روه‌سا قه‌ره‌بووكرنا ئه‌وان کەسێن ل بۆردومانێن ل سه‌ر سنووران شه‌هید د‌بن.
هه‌شت: ئاسانكاریكرن بۆ كۆمپانی و وه‌به‌رهێنه‌رێن هه‌رێما كوردستانێ و سەرەدەریکرنا دگەل وان وه‌ك كۆمپانییێن دی یێن عیراقێ.
نەهـ: مەزاختنا قه‌ره‌بوویا وەلاتییێن هەرێما کوردستانێ یێن گرێدای ب داخوازییێن مولکێ وان.
ده‌هـ: پێدانا په‌ین و پێدڤی و ئامیره‌یێن چاندنێ ب هه‌رێما كوردستانێ، هەڤشێوەیێ جووتیارێن دی یێن عیراقێ.
یازده: ڤەکرنا لقێن بانکێن چاندنێ و پیشەسازییێ ل هەرێما کوردستانێ.
دووازدە: دووپاتیکرن ل رێككه‌فتننامه‌یا شنگالێ.
سێزدە: دانپێدانکرن ب زانكۆ و په‌یمانگههێن دی یێن هه‌رێما كوردستانێ و بۆردێ كوردستانی یێ سه‌ر ب وه‌زاره‌تا خواندنا بلند و ڤەکۆلینێن زانستی ڤە.
چاردە: لەز نەکرن د بڕیاردانێ دا دەربارەی داخستنا نوونەراتییێن وەزارەتا پەروەردەیا ئیتیحادی ل پارێزگەهێن دی یێن عیراقێ.
پازده: دووپاتیکرن ل هەڤتەریبکرنا یانەیێن هەرێما کوردستانێ وەکی یانەیێن دی یێن عیراقی.
شازده: گرنگیدان ب دەڤەرێن مادده‌یێ 140.
هەڤدە: مە داخواز ژ سه‌رۆكوه‌زیرێن عیراقێ كر، قه‌ره‌بوویا خودانێن ئه‌وان دوكانان بهێتە کرن کو ب ئەگەرێ ڕوودانا ئاگربەربوونێ ل بازاڕێ لەنگە زیانێن مەزن گەهشتینێ.
