د بیرەوەرییا كیمیابارانكرنا باژێڕێ هەلەبجە دا مەسرور بارزانی، سەرۆكێ حكومەتا هەرێما كوردستانێ پەیامەك بەلاڤكر و تێدا ڕاگەهاند، ” ئارمانجا سەرەكی یا ڤێ تاوانێ و تاوانێن دی یێن ڕژێمێن ئێك ل دویڤ ئێك یێن عیراقێ ل دژی خەلكێ كوردستانێ، جینۆسایدكرنا گەلێ كوردستانێ و نەهێلانا ناسناما وێ بوو.
دەقێ پەیاما سەرۆكێ حكومەتێ:
د (36) ه‌مين سالڤەگەرا كیمیابارانكرن و كۆمكوژییا هەلەبجە دا، ب ڕێزڤە یادا شەهیدێن بێ تاوان یێن وی باژێڕێ خۆشتڤی یێ كوردستانێ دكەین كو بوونە قۆربانییێن دڕەندەییا ڕژێما پێشتر یا عیراقێ و بێدەنگییا كۆمەلگەها ناڤدەولەتی.
ئارمانجا سەرەكی یا ڤێ تاوانێ و تاوانێن دی یێن ڕژێمێن ئێك ل دویڤ ئێك یێن عیراقێ ل دژی خەلكێ كوردستانێ، جینۆسایدكرنا گەلێ كوردستانێ و نەهێلانا ناسناما وێ بوو، كو پێدڤییە هەردەم ئەڤ تاوانە ل بیرا مە بیت و هاندەرێ مە بیت بۆ داكوكیكرنێ ژ مافێن نەتەوەی و نشتیمانی و پاراستنا قەوارەیێ هەرێما كوردستانێ.
جهێ داخ و دلگرانییەكا مەزنە، پشتی ژناڤچوونا ڕژێما پێشتر، حكومەتێن ئێك ل دویڤ ئێك یێن عیراقێ، هەتا نوكە ئامادەنینن ب شێوەیەكێ ژ هەژی قەرەبوویا كەسوكارێن شەهیدێن هەلەبچە و قۆربانییێن شالاوێن ئەنفال و تاوانێن دی بكەن كو مافەكێ ڕەوا و دەستووری یێ خەلكێ كوردستانێ یە، هەتا ئامادەنینن ڕێككارێن ب پارێزگەهبوونا هەلەبجە ژی تەمام بكەن.
خزمەتکرنا خەلکێ هەلەبچە ب ئەركێ خۆ دزانین و هەیڤا بووری ل دەمێ سەرەدانا مە بۆ پارێزگەها هەلەبجە ، مە ڕازەمەندی دا ل سەر هەمی وان داخوازییێن كو ژلایێ بەڕێزان پارێزگار و بەرپرسێن كارگێری یێن وێ دەڤەرێ ڤە هاتبوونەكرن، هیڤیدارین ل داهاتی بشێین زێدەتر خزمەتا خەلكێ نشتیمانپەروەر و قۆربانیدەر یێ هەلەبجە بكەین.
شەهیدێن کارەساتا هەلەبجە و هەمی ئەو جینۆسایدێن بەرامبەر خەلکێ کوردستانێ هاتینەكرن هەردەم لبیرا مەنە و نابیت چ جاران ڕێكێ بدەین چ تشت ڤان تاوان و شەرمزارییان ژ بیرا مە و بیرا دەولەتا عیراقێ و دەستهەلاتدارێن بەغدا ببەت و پێدڤییە بەردەوام بیرا وان بینین كو پێدڤییە قەرەبوویا خەلكێ كوردستانێ بكەن.
سلاڤ بۆ گیانێ پاك یێ شەهیدێن هەلەبجە و گشت شەهیدێن کوردستانێ.
مەسرور بارزانی
سەرۆکێ حکومەتا هەرێما کوردستانێ
