پەیڤدارێ وەزارەتا چاندنێ یا عیراقێ ڕاگەهاند، پێشبینی دهێتەكرن بەرهەمێ ئەڤسالە یێ گەنمێ عیراقێ و هەرێمێ بگەهیتە زێدەتر ژ 6 ملیۆن تەنان و لیژنەیەكا هەڤپشك دناڤبەرا هەولێر و بەغدا دا دێ بڕیارێ ل سەر بڕا وی گەنمی دەت یێ كو دێ ژ جووتیارێن هەرێمێ هێتە وەرگرتن وهەماهەنگییەكا باش دناڤبەرا وەزارەتا چاندنێ یا عیراقێ و یا هەرێما كوردستانێ دا هەیە.
محەممەد خوزاعی، پەیڤدارێ وەزارەتا چاندنێ یا عیراقێ ئاشكەراكر، سالا بووری ب ڕێیا وەزارەتا بازرگانی یا عیراقێ 500 هزار تەنێن گەنمی ل هەرێما کوردستانێ ل پارێزگەهێن هەولێر، سلێمانی و دهۆکێ هاتنە وەرگرتن و جووتیاران ژی شایستەیێن خۆ یێن دارایی وەرگرتن.
سەبارەت ب وەرگرتنا بڕا گەنمێ ئەڤسالە ژی یێ جووتیارێن هەرێما کوردستانێ محەممەد خوزاعی دیار كر، ” ل دەمێ وەرگرتنا گەنمی لیژنەیەكا تەکنیکی یا هەڤپشك دێ هێتە پێكئینان و دێ بڕیارێ ل سەر بڕا وی گەنمی دەت كو دێ ژ هەرێما كوردستانێ هێتە وەرگرتن و پێشبینی دهێتەكرن بەرهەمێ ئەڤسالە یێ گەنمێ عیراقێ و هەرێمێ بگەهیتە زێدەتر ژ 6 ملیۆن تەنان، ئەڤەژی ژ پێدڤییا ناڤخۆ زێدەترە و ژمارەكا پیڤایی یە د دیرۆكا عیراقێ دا. “
گۆت ژی: گەنم ب ئێك بها دێ هێتە وەرگرتن و پشتی دەرچوونا وی ژ پشكنینان، هەر تەنەك ب 850 هزار دیناران دێ ژ جووتیاران هێتە وەرگرتن. “
سالا بووری وەزارەتا بازرگانی با عیراقێ نێزیكی 5 ملیۆن و 200 هزار تەنێن گەنمی ژ جووتیارێن عیراقێ وەرگرتن، ئەڤ سالە ژی پێشبینی دهێتەكرن بەرهەمێ گەنمی بگەهیتە زێدەتری 6 ملیۆن تەنان.
