ئاژانسا خانی:
سەرۆکێ دەستەیا گشتییا وەبەرھێنانێ ل هه‌رێمێ دیار كر: شاندێ ھەرێما کوردستانێ ل گەل بازرگان و وەبەرھێنەرێن فرەنسا رێککەفتییە” كو ل هه‌یڤا گولانا ئه‌ڤ ساله کۆربەنده‌كێ بازرگانی دناڤبه‌را ھەرێمێ و فرەنسا بهێته گێران.
د. محەمەد شوکری، زێده‌تر گۆت: شاندێ ھەرێما کوردستانێ ل فره‌نسا ل گەل ژوورا بازرگانییا پاریس و بزاڤا بازرگانییا فرەنسا کۆمبوویه و تێدا ته‌كه‌زی ل سەر زێده‌کرنا لێكگوهۆرینا بازرگانی دناڤبه‌را ھەرێمێ و فرەنسا دا هاتییه کرن، مه دڤێت ژ لایێ بازرگانی و ئابووری ژی ڤه وه‌لاتێ فرەنسا رۆل ل ھەرێما کوردستانێ هه‌بیت.
ناڤهاتی گۆت ژی: ب رێیا سازییێن فرەنسی و ژوورێن بازرگانی یێن فرەنسا، ئه‌م رێککەفتینه كو ل گولانا ئه‌ڤ ساله کۆربەنده‌كێ بارزگانی دناڤبه‌را بازرگان و وەبەرھێنەرێن ھەرێمێ و فرەنسا بهێته ئەنجامدان” هه‌روه‌سا فره‌نسا ژ لایێ سیاسیڤه دۆستێ ھەرێما کوردستانێیە و د گه‌له‌ك ره‌وشان دا فرەنسا ھەلویست ھەبوویە بۆ گەلێ کورد، ئه‌م کار دکەین بۆ هندێ رێژا وەبەرھێنانێ ژ لایێ کۆمپانی و وەبەرھێنەرێن فرەنسا ل ھەرێما کوردستانێ زێده ببیت” د بیاڤێن پیشەسازی و چاندنێ و چه‌ندین بیاڤێن دیتر دا، وەبەرھێنەرێن فرەنسی پشكدار بن د کەرتێ وەبەرھێنانێ دا.
