ئەڤرۆ چارشەمبی 27/3/ 2024 ێ” ل سەلاحەدین، سەرۆك بارزانی پێشوازی ل ستیڤن هیچن، بالیۆزێ بریتانیا ل عێراقێ كر، د وێ دیدارێ دا بیروڕا دهربارەیی رهوشا سیاسییا عێراقێ و هەرێما كوردستانێ لێكگۆهارتن، سەرۆك بارزانی دوپاتكر” هەر ژ 1991 ێ” پارتی دەستپێشخەرییا هەلبژارتنان و ڤهگوهاستنا شەرعیەتا شۆڕهشگێڕی بۆ شەرعیەتا یاسایی بوویە و هەردهم د هەڵبژارتنان دا دەنگێ ئیكێ ئینایە.
ئهڤه دهمێ دو سالایه هەڵبژارتن ب بههانهیێن جۆدا یێن سیاسی و هاندانا ژ دهرڤه دهێنه پاشخستن، نوكه ب بڕیارا سیاسییا دادگهها فیدرالی و لدووڤ ئەجێندایێن ژ دهرڤه، دەستكارییا یاسایێ هەڵبژارتنان هاتییه كرن، ژنوو دبێژن بلا هەلبژارتن بهێنه كرن، ئهم دخوازین ههلبژارتن بهێنه كرن ، بەلێ دووری دەستێوەردانێن ژ دهرڤه و بڕیارێن سیاسییێن مەبەستدارێن دادگەها فیدرالی كو” مهرهم پێ شكاندنا پارتی بیت.
سەرۆك بارزانی گۆت: ئهم ناچینە ژێر بارێ بڕیارا نهدەستوورییا دادگهها فیدرالی كو تێدا دادگههێ خۆ ئێخستییە جهێ دەستههلاتا یاسادانانێ و بجهئینانێ، گۆت ژی: تێبینی و داخوازییێن پارتی یاسایی و د چارچۆڤێ دەستووری و ژ پێخهمهت ئهنجامدانا هەلبژارتنهكا ڕاست و ڕەوا و پاقژ دانه.
سەرۆك بارزانی رۆناهی خستە سەر سیاسەتا برسیكرن و بڕینا بودجەیێ خەلكێ كوردستانێ و گۆت: “نابیت مامەلهیا سیاسی ل گەل بودجە و قووتێ خەڵكێ كوردستانێ بهێته كرن بۆ لاوازكرن و شكاندنا ئیرادا گەلێ كوردستانێ”، ب پێدڤی زانی كو چارەسەرییەكا ئێكلاكەر بۆ بابەتێ بودجەیێ هەرێما كوردستانێ بهێته دانان.
سەرۆك بارزانی دیار كر ژی: پشتا مه یا ستویره ب ڕەوایەتییا دۆزا گەلێ مه، هەرێما كوردستانێ ب خوین و رۆندكێن گەلێ كوردستانێ دروست بوویە، نەكو ب بڕیارێن دەرڤهیی ئیرادا گەلێ كوردستانێ.”
بالیۆزێ بریتانیا ل عێراقێ گۆت: وهلاتێ وی هەر ژ دهستپێكا سالێن نۆتان ل سهدێ بوری ههتا نوكه، ب گرنگی ڤه بهرێ خۆ ددهته ههرێما كوردستانێ و پشتهڤانییێ لێ دكهت، ل گەل هەرێما كوردستانا ب هێز و سەقامگیردایە” گۆت ژی: ڕۆلێ پارتی د پڕۆسا سیاسییا عێراقێ و كوردستانێ دا یا گرنگە و پڕۆسا سیاسی و هەلبژارتنان ل هەرێما كوردستانێ بێی ڕۆلێ پارتی پڕۆسەكا كامل نابیت و وان دڤێت د هاریكار بن بۆ چارەسەركرنا كێشان.
ئهو ژی گۆت: ئهم د دلگرانییێن ههوه تێدگەین و ئهم ل ڤێرێنه بۆ هندێ بزانین چاوا پشكدار و هاریكار بین بۆ چارەسەرییا كێشان و ئهنجامدانا هەڵبژارتنهكا ئازاد و پاقژ.
