جڤاتا پارێزگەها نەینەوا دەرگەهێ خۆ بەربژاركرنێ بۆ پۆستێ قایمقامێ شنگالێ ڤەكر و پێدڤییە د دەمێ 15 ڕۆژان دا بەربژار ناڤێن خۆ تۆماربكەن.
ل دویڤ زانیارییان، دەرگەهێ خۆ بەربژاركرنێ بۆ پۆستێ قایمقامێ شنگالێ هەر ژ دوهی ڕۆژا 28 ئادارێ هاتییە ڤەكرن و لیژنەیەكا جڤاتا پارێزگەهێ دێ هویربینییێ ل ناڤێن وان كەسان كەت ئەوێن خۆ بۆ وی پۆستی بەربژاردكەن و پێدڤییە ئەڤ مەرجە ل دەڤ هەبن:
1- ژیێ وی د سەر 30 سالییێ دابیت.
2- عیراقی بیت.
3- خۆدان باوەرناما زانكۆیێ بیت.
4- ل سەر چ تاوانێن مەزن نە هاتبیتە سزادان.
5- ئاكنجییێ وێ قەزایێ بیت.
6- نابیت ئەندامێ هێزێن چەكدار و سازییێن ئەمنی بیت.
7- ب تاوانا شەرەفێ نە هاتبینە تاوانباركرن.
8- خزمەتا وی یا فەرمی ژ 10 سالان كێمتر نەبیت.
