سه‌رۆكێ حكومه‌تا هه‌رێما كوردستانێ په‌یامه‌ك ل سالیادا جینۆسایدا ئه‌نفالێ به‌لاڤكر.
مه‌سرور بارزانى سه‌رۆكێ حكومه‌تا هه‌رێما كوردستانێ ڕاگه‌هاند، ئه‌ڤرۆ ئه‌و بیره‌وه‌رییا تاوانه‌كا مه‌زن و برینه‌كا ساخبووى یا جه‌سته‌یێ گه‌لێ كوردستانێ دكه‌ن، كو 36 سالان به‌رى نوكه، ڕژێما پێشتر یا عیراقێ ژ پێخه‌مه‌ت ژ ناڤبرن و بێده‌نگكرنا گه‌لێ كوردستانێ تاوانا جینوساید و كۆمه‌لكۆژییا ئه‌نفالێ كر.
سه‌رۆكێ حكومه‌تا هه‌رێما كوردستانێ ئاماژه ب هندێ دا، ئه‌نفال تاوانه‌كا كێم وێنه‌یه و ناهێته ژبیركرن، دڤێت هه‌رده‌م ئه‌و تاوانه و قورۆبانییێن وان ل بیرا وان بن، نه‌ڤییێن وان بزانن، كا خه‌لكێ كوردستانێ چ قۆربانییه‌كا مه‌زن ژ پێخه‌مه‌ت مافێن خوه یێن نه‌ته‌وه‌یى یێن ڕه‌وا دایه.
گوت ژى: حكومه‌تا هه‌رێما كوردستانێ د ده‌مه‌كیدا خزمه‌تكرنا زێده‌تر یا بنه‌مال و كه‌سوكارێن ئه‌نفالكرییان ب ئه‌ركێ خوه دزانیت، د هه‌مان ده‌مدا دووپات ژى دكه‌ت، ئه‌رك و به‌رپرسیاره‌تییا ئه‌خلاقى و ده‌ستوورییێ حكومه‌تا فیدراله، ب شێوه‌یه‌كێ ژ هه‌ژى قه‌ره‌بوویا كه‌سوكارێن ئه‌نفالكرییان و هه‌موو قۆربانییێن ده‌ستێ ڕژێما به‌عس بكه‌ت.
سه‌رۆكێ حكومه‌تێ ڕاگه‌هاند ژى، ئه‌وا بوویه جهێ داخێ ئه‌وه كو هه‌تا نوكه ژى كه‌س و لایه‌ن هه‌نه دڤێت ب هزركرنه‌كا شۆفینى و ب هه‌مان ئه‌و عه‌قلیه‌تا ل پشت كرنا تاوانا ئه‌نفالێ هه‌ى، ده‌ستدرێژییێ ل سه‌ر مافێن ڕه‌وا و ده‌ستوورییێن گه‌لێ كوردستانێ بكه‌ن، یێن كو ژ ئه‌نجامێ تێكوشانه‌كا بێ وێنه یا خه‌لكێ كوردستانێ ب ده‌ستڤه‌هاتین.
ل دووماهییێ مه‌سرور بارزانى سه‌رۆكێ حكومه‌تا هه‌رێما كوردستانێ ڕاگه‌هاند، ل سالیادا تاوانا ئه‌نفالێ، سه‌رێ ڕێز و نه‌وازشێ بۆ هه‌موو شه‌هید و ئه‌نفالكرییێن كوردستانێ د چه‌مینن و هه‌رده‌م د هزرا واندا دزیندینه.
