ئەڤرۆ ڕۆژا پێنجشەمبی 02-05-2024، مەسرور بارزانی، سەرۆکێ حکومەتا هەرێما کوردستانێ پێشوازی ل زیاد عەلی فازل، وەزیرێ کارەبا فیدرال کر.
د دیدارێدا دانوستاندن ل دۆر كار و پرۆژە و چاکسازییێن کەرتێ کارەبێ و پێدڤییێن بەردەوامبوونا هەماهەنگییێ دناڤبەرا حکومەتا هەرێما کوردستانێ و حکومەتا فیدرال ژ پێخەمەت باشترکرنا ڕەوشا کارەبێ هاتە كرن.
سەرۆکێ حکومەتێ ئاماژە ب هێرشێن تیرۆرستی یێن چەند ڕۆژێن بووری بۆ سەر کێلگەها غازا کۆرمۆر کر و دووپات کر کو هێرشکرنا سەر ژێرخانا ئابوورییا هەرێما کوردستانێ، زیان بۆ هەمی وەلاتییێن عیراقێ هەیە و پێدڤییە ئەڤ هێرشە ب دووماهی بهێن و ڕێك لێ بهێنە گرتن.
هەروەسا سەرۆکێ حكومەتێ ئامادەییا هەرێما کوردستانێ بۆ هەر هاریکاری و هەماهەنگییەكا پێدڤی ل گەل حکومەتا فیدرال دیاركر ژ پێخەمەت گرنگیدانا ژێرخانا وزێ، کو پێدڤییە ئەنجامدانا هەر کار و پرۆژەیەکی بتنێ ب ڕێكا سازییێن فەرمی یێن حکومەتا هەرێما کوردستانێ بیت.
وەزیرێ کارەبا عیراقێ، ستایشا هەماهەنگی و پەیوەنديیێن باش دناڤبەرا هەردوو وەزارەتێن فیدرال و هەرێمێ کر، ب ئاراستەیی پێشكێشكرنا باشترین خزمەتگوزاری بۆ وەلاتییان.
