ئەڤرۆ شاندەكێ وەزارەتا كارەبا عیراقێ سەرەدانا هەولێرێ كر و وەزیرێ كارەبا هەرێما كوردستانێ دیاركر؛ پشتی هێرشا درۆنی یا سەر كۆرمۆر، هەتا نوكە نێزیكی سێ هزار و 200 مێگاواتێن کارەبێ هەیە.
ئەڤرۆ ڕۆژا پێنجشەمبی 02-05-2024، شاندەكێ وەزارەتا کارەبا عیراقێ ب سەرپەرشتییا زیاد عەلی فازل، وەزیرێ کارەبێ سەرەدانا هەولێر کر و ل گەل کەمال محەمەد، وەزیرێ کارەبا هەرێما کوردستانێ کۆمبوو.
پشتی كۆمبوونێ، هەر ئێك ژ زیاد عەلی فازل و کەمال محەمەد د کۆنفرانسەكێ ڕۆژنامەڤانیدا زانیاریێن دیدارێ دیاركرن و ڕاگەهاند، هێرشا درۆنی بۆ سەر کێلگەها کۆرمۆر کاریگەری ل سەر ڕەوشا کارەبا هەرێما کوردستان و عیراقێ هەبوو.
وەزیرێ کارەبا هەرێما کوردستانێ ئاماژە ب هندێ كر، ئەو لژنا ل سەر ڕاسپاردەیا سەرۆکوەزیرێن عیراقێ سەرەدانا كێلگەها گازا کۆرمۆر کری، پێشنیارا هندێ كر كو ب ڕێكا سیستەمێ بەرگرییا ئاسمانی كێلگەهـ بهێتە پاراستن و پێدڤییە ئەڤ پێشنیارە بچیتە د وارێ بجهئینانێ دا.
