ئاژانسا خانی:
ئەندامه‌كێ لژنا نەفت و گازێ ل پەرلەمانێ عێراقێ دیار كر، حکومەتا عێراقێ یا خه‌مساره د دوبارە هنارتنا نەفتا هەرێما کوردستانێ ب رێیا بەندەرێ جەیهان یێ تورکی و حکومەتا تورکیا داخوازا 25 ملیۆن دۆلاران بۆ قەرەبووكرنا راوه‌ستییانا هنارتنا نه‌فتا هه‌رێمێ دكه‌ت” هه‌ر چه‌نده حکومەتا هەرێما كوردستانێ و حکومەتا فیدرالی ژی، پێنگاڤێن نوو بۆ هنارتنا نەفتا هەرێما کوردستانێ دگرنەبەر و بۆ وی بابه‌تی ژی دو لژنه دێ هێنه پێکئینان” ئەو دو لژنێن دهێنه پێکئینان، دێ میکانیزمێن هنارتنا نەفتێ گۆتوبێژ کەن و داكو بگەهنە لێک تێگەهشتنه‌كا هه‌ڤپشك ژ لایێ تەکنیکیڤه بۆ هنارتنا نەفتا هه‌رێمێ” دیسان گیروكرنا نه‌هنارتنا نه‌فتا هه‌رێمێ ڤه‌دگه‌ریت” بۆ هندێ” كو نه‌فتا به‌سرا قه‌ره‌بوونا نه‌فتا هه‌رێمێ كرییه” ئه‌ڤێ وه‌كرییه” كو حكومه‌تا عێراقێ د باهبه‌تێ هنارتنا نه‌فتا هه‌رێمێ یا خه‌مسار بیت و ل گه‌ل هندێ ژی” ئه‌مریكا و توركیا ژی چ پێنگاڤێن باش نه‌هاڤێتینه” كو جاره‌كا دی نه‌فتا هه‌رێمێ بۆ ده‌رڤه بهێته هنارتن.
سەباح سوبحی، زێده‌تر بۆ ئاژانسا خانی گۆت: هه‌تا نوكه هەردو حکومەتێن هەرێما کوردستانێ و عێراقێ ل سەر تێچوویێ دەرخستن و بەرهەمئینانا نه‌فتێ ل کێلگەهێن نەفتی یێن هەرێما کوردستانێ ڕێکنەکەفتینه و دانوستاندن ژی بۆ چارەکرنا وێ ئاریشێ د بەردەوامن” هه‌روه‌سا د یاسایێ بودجەیێ عێراقێدا، شەش دۆلار بۆ دەرخستنا هەر بەرمیله‌كێ نەفتێ ل هەرێما کوردستانێ هاتینه دیارکرن، ئەڤ پارە گه‌له‌كێ کێمە؛ حکومەتا هەرێما کوردستانێ و کۆمپانی ژی داخوازا کرییە ئەو پارە بگه‌هیته نێزیکی 24 دۆلاران.
ناڤهاتی گۆت ژی: حکومەتا تورکیا داخوازا 25 ملیۆن دۆلاران وەکو قەرەبوویا ڕاوەستییانا هنارتنا نه‌فتا هەرێما کوردستانێ بۆ بەندەرێ جەیهان ژ حکومەتا عێراقێ دكه‌ت” هه‌روه‌سا حکومەتا عێراقێ یا خه‌مساره د دوبارە هنارتنا نەفتا هەرێما کوردستانێ ب رێیا بەندەرێ جەیهان یێ تورکی” ل سەر ئاستێ ناڤدەلەتی ژی كۆمپانی بزاڤان بۆ هنارتنا نەفتا هەرێما کوردستانێ ددەن، بەلێ حکومەتا عێراقی یا رژد نینه د بابه‌تێ هنارتنا نه‌فتا هه‌رێمێ دا” دیسان ئه‌م ژی وه‌كو په‌رله‌مانتار دڤێت رابین ب هه‌مواركرنا پرۆژه قانوونا بودجه‌یێ عێراقێ و دڤێت بهایێ ده‌رخستنا به‌رمیله‌كێ نه‌فتێ ل هه‌رێمێ بگه‌هیته” دناڤبه‌را ( 20_24) دۆلاران.
