ئەڤرۆ 09-05-2024، مەسرور بارزانی، سەرۆکێ حکومەتا هەرێما کوردستانێ، پێشوازی ل عەزرا زییا، بریکارا وەزارەتا دەرڤەیا ئەمریکا بۆ کاروبارێن ئاسایشا سڤیل و دیموکراسی و مافێن مرۆڤی کر.
ل دویڤ ڕاگەهاندنا حکومەتا هەرێما کوردستانێ، د كۆمبوونێدا پێشڤەبرن ب پەیوەندییێن دوو لایانە و پاراستنا مافێن مرۆڤی و پێکهاتەیان و گرنگیدانا کلتوورێ پێكڤەژیانا ئاشتییانە و ئازاديیا ئایینی و ئاساییکرنا ڕەوشا شنگالێ هاتە گوتۆبێژكرن.
بریکارا وەزارەتا دەرڤەیا ئەمریکا، كەیفخۆشییا خۆ بۆ سەرەدانكرنا هەرێما كوردستانێ دیاركر و دووپات ل هندێ كر، “هەرێما کوردستانێ، هەڤپەیمان و هەڤبەشەكا ستراتیژی یا 360 پلەیێن ویلایەتا ئێكگرتییا ئەمریکایە ل عیراق و دەڤەرێ.”
هەروەسا د ڕاگەهاندنێدا هاتییە؛ هەردوولا د هەڤڕابوون ل سەر بەردەوامبوونا هەماهەنگی و کارکرنێ ل پێناڤ پێشڤەبرنا ب بها هەڤبەشییا دیموکراسی و پاراستنا مافێن مرۆڤ و ئازاديیا هزر و بیرا و ڕاگەهاندن و ئازاديیا کارکرنا جڤاكێ مەدەنی”.
سەرۆکێ حکومەتێ ژی سوپاسییا پشتەڤانی و هاریکارییا بەردەوام یا ئەمریکا کر و پابەندبوونا حکومەتا هەرێما کوردستانێ بۆ چەسپاندن و ب هێزکرنا بنەمایێن دیموکراسی و پاراستنا ئازادی و مافێن مرۆڤی ب گشتی دووپاتکر.
هەروەسا هەردوولا د هەڤڕابوون ل سەر ئەنجامدانا هەلبژارتنێن پەرلەمانێ کوردستانێ د زویترین دەم و پاراستنا مافێن پێکهاتەیێن کوردستانێ و چارەسەرکرنا هەمی ئەو ئاریشە و ئاستەنگێن ل بەردەم پرۆسەیا هەلبژارتنان.
