سەرۆك مەسعود بارزانی ب هەلكەفتا 48ەمین سالڤەگەرا بیرەوەرییا شۆڕەشا گۆلانێ، پەیامەك بەلاڤكر.
دەقێ پەیاما سەرۆك بارزانی:
بناڤێ خۆدێ مەزن و دلۆڤان
شوڕەشا گۆلانێ قۆناغەكا گرنگ یا مێژوویا گەلێ مە و ئەزموونەكا پڕبها یا خۆڕاگری و ڕابوونا گەلێ كوردستانێ یە.
ل ڕەوشا پشتی نسكو و ئاوارەییێ و ل ژێر فشارێن جوراوجور یێن نەیاران دا، ب پلانەكا هویر و باوەرییەكا بلند شۆڕەشا گۆلانێ بەرپابوو. شۆڕەشا گۆلانێ كو هەلگرا بها و ئارمانجێن شۆڕەشا مەزن یا ئەیلوولێ بوو، پەیامەكا ڕۆهن ب هەمی نەحەز و نەیارێن گەلێ كوردستانێ دا، كو سەرەڕای بهێزی و ستەمكارییا دۆژمنان و بوونا پیلانگێرییێن جوداجودا، گەلێ كوردستانێ خۆ ب دەستڤە بەرنادەت و تاكێن وێ دێ تێكۆشانا خۆ بۆ گوڕەپانا حەقیقی یا خەباتێ كو ئاخا پیرۆز یا كوردستانێ یە، ڤەگۆهێزن.
د چل و هەشتەمین سالڤەگەرا شۆڕەشا گۆلانێ دا، سلاڤان بۆ گیانێ ئێكەم شەهیدێ وێ شۆڕەشێ، شەهید سەید عەبدوللا حاجی ئۆمەرانی و هەمی شەهیدێن كورد و كوردستانێ دهنێرین و ئەو تێكۆشەر و قارەمانە چ جاران ناهێنە ژبیركرن یێن كو د خەباتا پێشمەرگایەتی و حزبی و خەباتا نهێنی یا ناڤ باژێڕی و د ئاوارەییێ دا ڕۆل د شۆڕەشا گۆلانێ دا هەی و قۆربانی دای و دیرۆك بۆ گەلێ خۆ دروستكری. ئەو دەستكەفتێن ب دەستڤەهاتین بەرهەمێ خوینا شەهیدان و ڕەنج و ماندیبوونا گەل و پێشمەرگە و خەباتگێڕێن شۆڕەشا گۆلانێ و هەمی شۆڕەشێن گەلێ كوردستانێ نە.
