پەیڤدارێ وەزارەتا چاندنا عیراقێ دیاركر، هەرێما كوردستانێ داخواز دكەت ب ڕێژا 100% وەرگرتنا گەنمی زێدە بیت.
محەمەد خوزاعی، پەیڤدارێ وەزارەتا چاندنا عیراقێ ڕاگەهاند، بەرهەمێ گەنمێ ئەڤسالە ل هەمی عیراق و هەرێما كوردستانێ ژی دگەهیتە نێزیكی شەش ملیۆن و 500 هزار تەنان، ل هەرێما كوردستانێ دروینا گەنمی دەستپێكرییە، بەلێ پڕۆسەیا وەرگرتنا گەنمی ژ لایێ وەزارەتا بازرگانییا عیراقێ ڤە هێشتا دەستپێ نەكرییە.
پەیڤدارێ وەزارەتا چاندنا عیراقێ دیاركر، پڕۆسەیا وەرگرتنا گەنمێ جووتیارێن هەرێما كوردستانێ ئاریشە دروستبوویە، بەرهەمێ گەنمێ سالا بووری ل عیراقێ، پێنج ملیۆن و 200 هزار تەن بوون، زێدەهییا ئەڤسالە ژی ملیۆنەك و 300 هزار تەنە، نوكە هەرێما كوردستانێ داخواز دكەت 100% پشكا وەرگرتنا گەنمی بهێتە زێدەكرن.
دهێتە زانین، ل دویڤ داتایێن چاندنا عیراقێ، كو سالا بووری 500 هزار تەنێن گەنمی ژ جووتیارێن هەرێما كوردستانێ هاتبوو وەرگرتن.
