حەفت وەلاتێن ئەندام د ئێكەتییا ئەوڕۆپا دا ڕاگەهاند، پێدڤییە هەلسەنگاندن بۆ ڕەوشا سووریا بهێتەكرن داكو ڕێ ب ڤەگەڕیانا ئارەزوومەندانە یا پەنابەرێن وی وەلاتی بهێتەكرن.
د ڕاگەهاندنەكا هەڤپشك دا بەرپرسێن هەرئێك ژ نەمسا، چیك، قوبرس، یۆنان، ئیتالیا، مالتا و پۆلەندا ڕاگەهاند، ئەو د هەڤڕانە كو پێدڤییە هەلسەنگاندن بۆ ڕەوشا سووریا بهێتەكرن، ژبەركو ب بوچوونا وان ڕەوشا وی وەلاتی بەرەڤ پێشچوونەكا بەرچاڤ ب خۆڤە دیتیە و دنوكەدا ئەو دشێن ڕێ ب پەنابەران بدەن ئارەزوومەندانە ڤەگەڕن.
کۆنستانتینۆس ئایۆنۆ، وەزیرێ ناڤخۆ یێ قوبرس ڕاگەهاند ، ئاژانسا پەنابەران یا نەتەوێن ئێكگرتی هێلا پەیوەندیکرنێ ل گەل دامودەزگەهێن سووریا دامەزراندیە بۆ گوتوبێژكرنێ ل سەر ئەگەرێ ڤەگەڕاندنا پەنابەران.
دیار ژی كر، ل دەستپێكێ ڤەگەڕاندن بتنێ دێ بۆ وان كەسان بیت یێن كو دڤێت ب ئارەزوویا خۆ ڤەگەڕنە سووریا، لێ دبیت د قۆناغێن د دویڤدا پەنابەر ب نەچاری بهێنە ڤەگەڕاندن.
