بڕیارە ئەڤرۆ ڕۆژا چارشەمبی، جڤاتا وەزیرێن هەرێمێ ب سەرپەرشتییا مەسرور بارزانی، سەرۆكێ حكومەتا هەرێمێ و ب ئامادەبوونا قۆباد تالەبانی، جێگرێ سەرۆكێ حكومەتێ كۆمبیت و چار بڕگەیێن سەرەكی گوتوبێژكەت.
بڕگا ئێكێ: ئەنجامێن سەرەدانا شاندێ بلند یێ حكومەتا هەرێمێ و نوینەرێ كۆمپانییێن پەتڕۆلێ بۆ بەغدا كو ل ڕۆژێن 8 و 9 خزیرانێ ل گەل وەزارەتا پەتڕۆلا عیراقێ بۆ بابەتێ هناردەكرنا پەتڕۆلا هەرێمێ كۆمبوون.
بڕگا دووێ: پرسا ڤەكرنا دوو گۆڕەپانێن گومركی ل پارێزگەهێن دیالە و میسل كو دێ ژلایێ حكومەتا فیدڕال ڤە هێنە ڤەكرن، ژبەركو دێ كارتێكرن ل سەر لڤینا بازرگانی یا دەروازێن سنۆری یێن هەرێما كوردستانێ هەبیت.
بڕگا سییێ: تایبەتە ب دیاركرنا بابەتێ سەرژمێرییا گشتی یا ئاكنجییان كو بڕیارە ل 20 – 21 چریا دووێ یا ئەڤسالە ل عیراقێ و هەرێما كوردستانێ بهێتە ئەنجامدان.
بڕگا چارێ: تایبەتە ب دیاركرنا ئامادەكارییێن وەزارەتا پەروەردێ و لایەنێن پەیوەندیدار بۆ تاقیكرنێن گشتی یێن پۆلا 12 ئامادەیی ل سەرتاسەری هەرێما كوردستانێ.
