پارێزگارێ دهۆكێ پێشوازی ل وه‌زیرێ كۆچ وكۆچبه‌رێن حكومه‌تا ئه‌لمانیا كر

د.عه‌لى ته‌ته‌ر پارێزگارێ دهۆكێ ئه‌ڤرۆ پێشوازیا یواخیم شتامب، وه‌زیرێ كۆچ وكۆچبه‌رێن حكومه‌تا ئه‌لمانیا فیدرال و شاندێ دگه‌ل دا كر .

د كۆمبوونێدا، به‌حس ل په‌یوه‌ندیێن هه‌رێما كوردستانێ ل گه‌ل وەلاتێ ئه‌لمانیا و ڕه‌وشا ئاواره‌ و په‌نابه‌ران ل ناڤ و ده‌رڤه‌ى كه‌مپا ل سنوورێ پارێزگه‌هێ و ئه‌و هاریكاریێن حكومه‌تا ئه‌لمانیا ب رێكێن جودا تایبەت ب رێكا ڕێكخراوێن مرۆڤایه‌تى پێشكێشى هه‌رێما كوردستانێ و ئاوارا دكه‌ن هاته‌ كرن.

وه‌زیرێ كۆچ و كۆچبه‌رێن ئه‌لمانیا فیدرال سوپاسییا خه‌لكێ ده‌ڤه‌رێ و كارگێریا پارێزگه‌ها دهۆكێ كر ل دۆر وێ سه‌ره‌ده‌ریا مرۆڤایه‌تى یا جوان یا ل گه‌ل ئاواره‌ و په‌نابه‌ران هاته‌كرن، هه‌روه‌سا ده‌ستخوشى ل كارگێریا پارێزگه‌ها دهۆكێ و سازیێن په‌یوه‌ندیدار كر ژبۆ به‌رهنگاربوونا وان ل هه‌ر قه‌یرانه‌كێ و چاره‌سه‌ركرنا هه‌می ئالوزیان و سوزدا كو حكومه‌تا ئه‌لمانیا ل دووڤ شیانا هاریكاریا هه‌رێما كوردستانێ و ئاواره‌ و په‌نابه‌ران بكه‌ت.

پارێزگارێ دهۆكێ سوپاسییا حكومه‌تا ئه‌لمانیا فیدرال كر هه‌مبه‌ر ئه‌و هاریكاریێن به‌رده‌وام نه‌خاسمه‌ ل دەمێ قه‌یرانا پێشكیشى هه‌رێما كوردستانێ و ب تایبه‌تى بۆ پارێزگه‌هێ كرین و خواست هه‌می جورێن په‌یوه‌ندیا ل گه‌ل وه‌لاتێ ئه‌لمانیا پتر پێشبكه‌ڤن و حكومه‌تا ئه‌لمانیا وه‌كو جارا هاریكاریا هه‌رێما كوردستانێ و پارێزگه‌ها دهۆكێ بكه‌ت.