مه‌سرور بارزانى و شانده‌كێ سه‌ربازییێ بریتانى: پێدڤییه‌ پشته‌ڤانیكرنا هێزێن پێشمه‌رگه‌ى یا به‌رده‌وامبیت

مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل شانده‌كێ سه‌ربازییێ بریتانیا ب سه‌رۆكایه‌تییا ئیدوارد ئالگرن شیره‌تكارێ بلندێ به‌رگرییا بریتانیا بۆ كاروبارێن ڕۆژهه‌لاتا ناڤین و باكوورێ ئه‌فریكا كر.
ل دووڤ ڕاگه‌هاندنا حكومه‌تا هه‌رێما كوردستانێ، دكۆمبوونێدا كو ئه‌ندرو بیزلى كونسۆلێ گشتییێ بریتانیا ل هه‌رێما كوردستانێ تێدا یێ پشكداربوو، دانوستاندن ل دۆر دووماهى گوهۆرین و پێشهاتێن ڕه‌وشا گشتییا عیراقێ و ده‌ڤه‌رێ و پێشڤه‌برنا هه‌ماهه‌نگی و هاریكارییا ئه‌منى و سه‌ربازى دناڤبه‌را هه‌رێما كوردستانێ و بریتانیادا و پێشكه‌ڤتنێن پرۆسه‌یا چاكسازییا وه‌زاره‌تا پێشمه‌رگه‌ى هاتنه‌ كرن.
هه‌ردوو لایه‌ن ل سه‌ر گرنگییا به‌رده‌وامبوونا پشته‌ڤانیكرنا هێزێن پێشمه‌رگه‌ى بۆ ڕووبرووبوونا گه‌فێن تیرۆستێن داعشێ دهه‌ڤرابوون.
دته‌وه‌ره‌كێ دیدا، هزر و بیر ل دۆر پاشه‌رۆژا ئه‌ركێ هێزێن هه‌ڤپه‌یمانان ل عیراقێ و هه‌رێما كوردستانێ هاتنه‌ لێكگۆهارتن، دڤى بیاڤیدا دووپاتى ل پێدڤییا درێژه‌دان ب پشته‌ڤانیكرنا پێشمه‌رگه‌ى ژ پێخه‌مه‌ت ئاسایش و سه‌قامگێرییا كوردستانێ هاته‌ كرن.