<h3 style="text-align: justify;"><span style="font-size: 18pt;">سهرۆكێ ههرێما كوردستانێ ب پهیامهك ب ههلكهڤتا شۆرهشا ئهیلوولێ بهلاڤكر و دبێژیت: بوویه بنهمایێ ئێكهم دانپێدانا فهرمى ب مافێن گهلێ كوردستانێ وبنیاتێ ههموو دهستكهڤتێن دووڤدا.</span> <span style="font-size: 18pt;">دهقێ پهیاما نێچیرڤان بارزانى سهرۆكێ ههرێما كوردستانێ ل 63ێ سالییا شۆرهشا ئهیلوولێ:</span> <span style="font-size: 18pt;">ل ( 63 )ێ سالییا شۆرهشا مهزنا ئهیلوولێ، بارزانییێ مهزن ڕابهرێ شۆرهشێ و ههموو پێشمهگهیێن قارهمان و ههموو تێكوشهر ل بیردئینن، كو هێز و دهست و بازێن شۆرهشێ بوون، ب پێزانین و شكۆدارانه ڤێ ههلكهڤتێ ساخ دكهن.</span> <span style="font-size: 18pt;">سلاڤ بۆ گیانێ وان یێ پاقژ، سلاڤ ل ههموو خهباتگێرێن ئهوێ ڕۆژا دژوار یێن كو هێشتا دژیانێدا ماین، هیڤییا تهمهن درێژى و سلامهتییێ بۆ دخوازین.</span> <span style="font-size: 18pt;">شۆرهشا مهزنا ئهیلوولێ كو شۆرهشا ههموو گهلێ كوردستانێ بوو و ب ههموو پێكهاتهیانڤه بوو، بوویه كرۆكا هزر و ناسنامهیا نهتهوهى و نیشتیمانى و شكۆیا ههموو كوردستانییان و ئیرادهیا پۆلایینییا گهلێ كوردستانێ بۆ بهرهنگاربوونا ستهم و داگیركارییێ، شۆرهشا دهنگێ زهلالێ ئازادیخوازان و دۆزا ڕهوایا گهل و نیشتیمانهكى بوو كو ژ پێخهمهت ئازادییێ ههموو قۆربانى داینه، بوویه بنهمایێ ئێكهم دانپێدانا فهرمى ب مافێن گهلێ كوردستانێ و بنیاتێ ههموو دهستكهڤتێن دووڤدا.</span> <span style="font-size: 18pt;">د دهمهكیدا ب شانازیڤه ئهڤێ ههلكهڤتێ ل بیر دئینن، دووپاتییێ ل ئیرادهیا مۆكۆما گهلێ كوردستانێ بۆ پاراستن و ب دهستخستنا تماما مافێن دهستوورى و تهباییا پێكڤه دناڤ ههموو پێكهاتهیێن وێدا دكهین، ب ئومێد و گهشبینیڤه دهست ب پرهنسیپ و بهایێن بلندێن شۆرهشێ دگرین ل خهبات و خۆ ب دهستڤهبهرنهدان و تێكۆشانێ ژ پێخهمهت ئازادى و دیموكراسییێ، ههتا دگههینه سهركهڤتنێ و ب جهئینانا خهونا شههیدان و بهرهڤ پاشهرۆژهكا باشتر، دێ دبهردهوامبین.</span> <span style="font-size: 18pt;">بلند و ب ڕێز بیت ههلكهڤتا شۆرهشا مهزنا ئهیلوولێ، سلاڤ ل گیانێ شههیدێن كوردستانێ و سلاڤ بۆ گیانێ وان یێ پاقژ.</span> <span style="font-size: 18pt;">نێچیرڤان بارزانى</span> <span style="font-size: 18pt;">سهرۆكێ ههرێما كوردستانێ</span> <span style="font-size: 18pt;">11ى ئهیلوولا 2024ێ.</span></h3>
