ئەڤرۆ چارشەمبی 13 ی چریا دووێ 2024 ێ، نێچیرڤان بارزانی، سەرۆکێ هەرێما کوردستانێ، پێشوازی ل ئالبرێشت فۆن ڤیتکە، کونسۆلێ گشتییێ نوو یێ ئەلمانیا ل هەرێما کوردستانێ کر.
د وێ دیدارێ دا کونسۆلێ گشتییێ ئەلمانیا، پیرۆزباهییا سەرکەفتنا هەلبژارتنێن پەرلەمانا کوردستانێ ل نێچیرڤان بارزانی و گەلێ کوردستانێ کر و سەرسامیا خۆ ب رێژا پشكدارییێ د هەلبژارتنان دا نیشان دا” هەروەسا ل گەل سەرۆکێ هەرێما کوردستانێ، قووناغا داهاتی و بزاڤێن پێکئینانا کابینا نوو یا حکومەتا هەرێما کوردستانێ، گەنگەشە کرن.
هەردو لایەنان دوپاتی ل سەر خواستا دو لایەنی بۆ پێشڤەبرنا پەیوەندیێن ئەلمانیا دگەل عیراقێ و هەرێما کوردستانێ و بەرفرەهکرنا هاریکارییا هەڤپشك، ب تایبەتی د وان بیاڤاندا یێن بۆ هەرێما کوردستانێ گرنگن کرن.
نێچیرڤان بارزانی، سۆپاسی و پێزانینێن هەرێما کوردستانێ بۆ پشتەڤانیا ئەلمانیا ل عیراقێ و هەرێما کوردستانێ، دەربڕی.
هەروەسا بهحسێ پەیوەندیێن هەولێر – بەغدا، رەوشا دەڤەرێ و مەترسیا ئەنجامێن ئالۆزیێن رۆژهەلاتا ناڤین، تەوەرەکێ دیتر یێ وێ كۆمبوونێ بوو.
