ب هه‌لكه‌فتا هاتنا سالا نوو یا 2025 ێ ز، گەرمترین پیرۆزباهییا ئاراسته‌یی هه‌موو وه‌لاتییێن کوردستانێ دکەم، ب تایبەتی بنەمالێن سەربلندێن شەهیدان، پێشمەرگەیێن قه‌هره‌مان، هێزێن ناڤخۆ و هەموو پێکهاتێن كوردستانێ، هه‌روه‌سا پيرۆزباهییێ ل هه‌موو گه‌لێن عێراقێ و جيهانێ دكهم” هيڤیدارم سالا نوو، بۆ هه‌موویان ساله‌كا پڕ ئاشتی، سەقامگیری و خێر و خۆشى بیت.
ل سالا 2024 ێ” گوهۆرین و وەرچەرخانێن مه‌زن ل ده‌ڤه‌رێ په‌یدا بوون و ته‌حه‌دییاتێن ئەمنی و سیاسی، کاریگەری ل سەر ره‌وشا هه‌موو ده‌ڤه‌رێ دروست كرییه” ئەڤان پێشهاتان پێدڤی ب هزركرنه‌كا بلند و بهێزكرنا ته‌ڤايى و ئێكده‌نگيیا ناڤخۆیی هه‌یه بۆ به‌رهنگاربوونا ئەوان مەترسیێن گه‌فێ ل سه‌ر ئاسایش و سەقامگیرییێ دکەن، هه‌روه‌سا بۆ مفا وه‌ر‌گرتن ژ ده‌لیڤان.
داخوازێ ژ هەموو لايه‌نێن سیاسی و پێکهاتێن کوردستانی دکەم هه‌موو پێكڤه كار بكه‌ن بۆ ده‌ربازكرنا ناكۆكييان و ب گیانێ بەرپرسیاريه‌تيیا نیشتمانيیا هه‌ڤپشك، به‌ره‌ف داهاتی پێنگاڤا بهاڤێژن” د ڤێ ره‌وشێ و قووناغێ دا، پێكڤه‌يى و کارێ هه‌ڤپشك رێكا ئێكانه‌یه بۆ بهێزکرنا پێگەهێ هەرێما کوردستانێ و دەستەبەرکرنا مافێن وان یێن ڕەوا، له‌وما ته‌كه‌زییێ ل سه‌ر گرنگيىا بله‌زكرنێ ل دامه‌زراندنا كابينا نوو یا حكومه‌تا هه‌رێما كوردستانێ دكهم.
هەر ب ڤێ هه‌لكه‌فتێ پابەنديیا هه‌رێما كوردستانێ بۆ کارکرنێ ل گه‌ل حکومەتا عێراقا فیدرالی و هه‌ڤپشكێن هه‌رێمی و نێڤدەولەتی بۆ به‌رهنگاربوونا ته‌حه‌دییاتێن هه‌ڤپشك و ڤه‌دیتنا چارەسەرییا هەمیشەیی بۆ كێشان دوپات دكهم” هاركاريیا دناڤبه‌را مه‌دا دێ بیته هۆكارێ سه‌قامگيرییێ و ئاشتی و پێشكه‌فتنێ ل عێراقێ و ده‌ڤه‌رێ و هاریكارییا پێكڤه‌ژيانا ئاشتييانه یا گه‌لان و پێكهاتێن ده‌ڤه‌رێ دده‌ت.
هه‌رێما کوردستانێ ب حه‌ز و ئیرادا دڵسۆزێن گه‌لێ مه ل هه‌موو پێكهاتان و هێزێن نيشتیمانی، شیانێن ده‌ربازكرنا ته‌حه‌دییان و بەردەوامبوونێ د ئاڤاكرنا داهاتییەکێ باشتر بۆ نڤشێن داهاتی دا هەیە.
سالا نوو ل هه‌موویان پیرۆز بیت.
