د درێژاهیا دیرۆکێدا، کورد مللەتەکێ قارەمان بووینە، بەردەوام هەڤسەنگییا هێزێ د بەرژەوەندا وی لایەنی دا شکاندیە، یێ پشتا خۆ ب کوردان موکم کری، ب تایبەت لسەر دەمێ دەولەتا ئیسلامێ، کو کورد پێشەنگ بوونە، ب تایبەتتر لسەر دەمێ “سەلاحەددین ئەیوبی”، کو شیا هێزەکا ئێکگرتی ل سەر ئاستێ دەولەتا ئیسلامێ دروست بکەت، و سەرکردایەتییا لەشکەری ل هەمی بەروکێن شەری بکەت، و پیرۆزترین دەڤەرێن دەولەتا ئیسلامی ژ دەست داگیرکەران بینیتەدەر، ئەڤەژی وەرچەرخانەکا مێژوویا گرنگ بوویە، کو هەتا نوکە کورد و عەرەب و هەمی نەتەوێن موسلمانان شانازیێ پێ دکەن و دبیت مەزنترین ئەگەر بیت، کو هەتا نوکە کوردان چ کیانێن سەربەخۆ ب دەست ڤە نەئینابن، بەلێ هەر شانازیێ پێ دکەین، هەروەسا د شەرێن دەولەتا عوسمانی و سەفەویدا، بەردەوام دەولەتا عوسمانی ب سەردکەڤیت، ئەو ژی ب پشتەڤانی و شەرکەرێن کورد، بەلێ چ جاران رێک نە د دا و نادەت، کیانەکێ کوردی دروست ببیت و هەردەما میرنشینەکا کوردی سەرێ خۆ هەلدابیت، داخوازا خۆ ب رێڤەبرنێ یان سەربەخۆییێ کربیت، هێرش کریێ و ژناڤ بریە، هەردەم خواستیە کورد د ژێر دەستبن، و شەرکەر و پشتەڤانێن وێ بن، بەلێ د سەد سالێن بوریدا و پشتی دەولەتا ئیسلامی ژ ناڤچوویی و دەولەتێن نەتەوەیی هاتینە دامەزراندن و دەڤەر هاتییە دابەشکرن، کوردان هەست ب هندێ کر، کو دڤێت خەباتا خۆ ژ سەنگەرێ ئایینی ب گشتی و ئیسلامی ب تایبەت ب گۆهورن و سەنگەرێ نەتەوەیی بگرن، ژبەر کو مللەت و نەتەوێن دی ب ناڤێ ئیسلامێ و ژێر ناڤێ ئیسلامێ زورداری ل کوردان کر و کوردستان قوربانی بەرژەوەندییێن خۆ کرن و پارچەکر، ئانکۆ ئەو دلسۆزی و پێگیریا مللەتێ کورد بۆ ئیسلامێ هەی، پێ هاتنە خاپاندن.
بەلێ پشتی زەحمەتەکا زۆر یا زانا و سەرکردەیێن کوردی، و چەندین شورەش و خەبات و قوربانیدانان، بۆ مللەتێ کورد دیار بوو، کو خەباتا مە خەباتەکا نەتەوەییە، و دڤێت بۆ ب دەست ئێخستنا مافێن خۆ پشتبەستنێ ب زمان و کەلتور و هێز و شیانێن خۆ بکەین.
ل ڤێرێ کوردان بۆ دونیایێ دیارکر، کو مللەتێ کورد مللەتەکێ قەهرەمانە، و شەرکەرن، و بەرەڤانییێ ژ خۆ دکەن، و دژی شەر و داگیرکرنێنە، هەروەسا داخازا وەلاتەکێ دیموکراسی دکەن و دگەل ئاشتییێنە، دونیایێ ژی دەرییێن خۆ ل بەر ڤەکرن، و شانازیێ ب مللەتێ کورد دکەن، د رۆژهەلاتا ناڤینا خوین خواردا، کورد ئالایێ ئاشتیێ و پێکڤەژیانێ بلند دکەن.
یا پێدڤی کورد بکەن تا د گەهنە هەمی مافێن خۆ، و سەربەخۆیێ وەرگرن، دڤێت کورد وەکو نەتەوە خەباتێ بکەن، و ل ژێر هیچ ئایدولوژیەکێ خۆ پەردە پوش نەکەن، هەتا ب ناڤێ ئیسلامێ ژی، ژبەرکو نە عەرەب نە فارس و نە تورک هەبوونا مە قەبوول نەکریە و قەبوول ناکەن، ئەم د نەچار نینین پشتا خۆ ب وان گەرم بکەین، و ب ناڤێ دینی خۆ ب خاپینین، ئەم خودان سەرکردیێن چاڤنەترسین، ئەم خۆدان مللەتەکێ خۆدان ئیرادەینە، و خۆدان هێزا پێشمەرگەیێ کوردستانێینە، کو هێزەکا رێکخستییە، و لژێر بریارا مەرکەزی لڤینان دکەت، و دوورە ژ هێزێن میلیشات و هزرێن توندرەو ئەوێن ب ناڤێ ئیسلامێ دهێنە دروستکرن.
ئەز باوەرم ئەڤ مودێلا حکومرانیێ ل رۆژئاڤایێ کوردستانێ پاش ل هەر چوار پارچێن کوردستانێ هێتە دووبارەکرن، هەتا هەر چوار پارچە ب سەرخۆبوونێ شاد دبن، و ڕۆژ ڕۆژا مللەتێ کوردە، و کورد دگەل دونیایا ئازاد هەڤپەیمانە، و نە جهێ مەترسیێ یە بۆ چ هێز و دەولەتان، ژبلی وان دەولەتێن ئاخا مە داگیرکری، کو دزانن دێ رۆژەکێ هێتە ئازادکرن، و ب مەترسی لسەر خۆ دزانن.
ب هیڤییا هندێ ئەم کورد بزانین ئەم نەڤییێن” سەلاحەددین ئەیوبی ” و “مەلا مستەفا بارزانی”نە، ئەو سەرکردەیێن بووینە رۆژەکا گەش بۆ خۆ نیاسینێ، و بنیاتنانا وەلاتەکێ سەربەخۆ.
