ھەموو تاکێن کورد دچاڤێن نەحەزان دا ئێکن

ھەڤگرتنا پارتێن کوردی، پێتڤیەکە بۆ پاشەرۆژەکا گەش

جعفر سمو

رۆژا ئێکی شوباتێ ل سالا 2004ــێ ل ھەولێرا پایتەخت کارەساتەکا  مەزن ب سەر گەلێ کوردستانێ دا ھات و سەلماند کو ئارمانجا دوژمنێن گەلێ  کوردستانێ ژناڤبرنا دۆزا کوردییە، ئەڤ چەندە ژی نامەیەکا ئاشکەرا بوو کو دوژمنێن گەلێ کورد بۆ ژناڤبرنا دۆزا کوردی د ھەڤگرتینە، لەوا دڤێ قوناغێدا ھەڤگرتنا پارتێن کوردی پێتڤیەکا دیرۆکی یە بۆ پاراستنا داھاتیەکێ پتر سەقامگیر و ئارام  بۆ گەلێ کوردستانێ .

ھەڤکاریا سیاسی و ھەماھەنگییا دناڤبەرا ھێزێن کوردی دا  بێ گومان دێ بتیە ئەگەرێ  ب ھێزکرنا ھەلویستێ سیاسی و پاراستنا مافێن رەوا یێن گەلێ مە و بەرهەنگاربوونا بزاڤێن  ژناڤبرنا ناسنامەیا کوردی، لەورا ئێکگۆتارییا  کوردی  نە ب تنێ  بژاردەیەکە بۆ کوردستانییان بەلکو پێتڤییەکا بلەزە بۆ رووبرووبوونا ئاستەنگێن  نۆکە  وئاڤاکرنا  پاشەرۆژەکا گەش.

ئەڤ کارەساتا کو ل ئێکی شوباتێ روودایی ل دەمەکی بوو کو کوردستان ھێدی ھێدی د بوو جھێ گرنیپێدانا نێڤدولەتی و نێزیکی دەهــ سالێن ئێکێ بوون ژئەزموونا دیموکراسی، دڤی دەمی دا گەلێ کوردستانێ سەلماند کو شیانێن ب رێڤەبرنا ھەرێمێ ب باشی ھەنە، رەنگە  ئەڤ پێشکەڤتن  و سەربۆرا ھەرێمێ ئاستەنگ بوون ل بەر پیلانێن دوژمنێن گەلێ کورد، ھەروەسا شەھیدێن ڤێ کارەساتێ باشترین بەلگەنە کو ھەموو تاکە کەسێ کورد دچاڤێن نەحەزان دا ئێکن چونکی ئەڤ شەھید ژ رێزێن ھەردوو پارتێن دیموکراتی کوردستان و یەکێتی نشتیمانی کوردستان بوون، ب ڤی رەنگی  گرنگییا ئێکگۆتاریا کوردی بۆ رووبرووبوونا ئاستەگان دیار دبیت چونکی چارەنڤیسێ گەلێ کورد ئێکە دچاڤێن نەیاران دا، لەوا پێتڤی ب ھێزکرنا ھەڤکاریا سیاسی و جڤاکی ھەیە ، بۆ پاراستنا ئایندەیەکێ ئارام  و سەقامگیر.

ژخودایێ مەزن دخوازین جھێ ھەموو شەھیدێن کوردستانێ و رێکا ئازادیێ و ب تایبەت شەھێدێن ڤی کارەساتێ بەھشتا بەرین بیت .