نێچیرڤان بارزانی و وەزیرێ دەولەتێ بۆ كاروبارێن ناڤخۆ یێن ئەلمانیا دووپاتی ل هاریكارییا هەڤپشك كر

د چارچووڤێ چالاكییێن خۆدا ل كۆنفرانسێ ئاسایشا میونشن، نێچیرڤان بارزانی سەرۆكێ هەرێما كوردستانێ د دیدارەكێدا هانز جۆرج ئەنگەلكە، وەزیرێ دەولەتێ بۆ كاروبارێن ناڤخۆ یێن ئەلمانیا، بەحسا هاریكارییا هەڤپشكا ئەمنییا ئەلمانیا دگەل عیراقێ و هەرێما كوردستانێ كر.

هەردوو لایان دووپاتی ل پێشڤەبرنا هاریكارییا ئەلمانیا دگەل لایەنێن پەیوەندیدارێن عیراقێ و هەرێما كوردستانێ دەربارەی كۆچا نەقانوونی و ڕووبروبوونا تاوانان كر.

سەرۆكێ هەرێما كوردستانێ هەڤخەمییا خۆ گەل و دەولەتا ئەلمانیا و كەسوكارێن قوربانییێن هێرشا تیرۆرستییا دووهی ل میونشن دەربری، كو ژ ئەنجامێ هێرشەكێ ب ترۆمبێلێ، ژمارەیەكا وەلاتییان برینداربوون.