وەزارەتا ئەوقافێ: نابیت گۆتارێن پشتی ئێڤارى ژ 20 خۆلەکان زێدەتر بن

وەزارەتا ئەوقاف و كاروبارێن ئاینى ل كوردستانێ ڕێنمایێن تایبه‌ت بۆ هەیڤا رەمەزانێ به‌لاڤكرن.
*ده‌قێ ڕێنمایێن وەزارەتا ئەوقافێ؛
– دیارکرنا ئێکەم و دووماهى ڕۆژا هەیڤا ڕەمەزانا پیرۆز ب تنێ د دەستهەلاتا لژنا بلند یا دیتنا هەیڤێ‌ یا وەزارەتا ئەوقافێ دایه‌.
– خشتێن دەمێن بانگدانێ ل هه‌موو مزگەفتێن هەرێما کوردستانێ و ل دەزگەهێن ڕاگەهاندنێ دێ هێنه‌ به‌لاڤكرن.
– نابیت گۆتارێن پشتی ئێڤارى ژ 20 خۆلەکان زێدەتر بن، دڤێت ب تنێ ژلایێ مامۆستایێن مزگەفتێڤە و ب مایکروفۆنا ناڤخۆیی بهێته‌ پێشکێشکرن.
– ده‌مێ دناڤبەرا ئیمساك و بانگدانا سپێدێ دێ ل دووڤ خشتێ پارێزگەهێ بیت و نابیت بەروڤاژی بیت.
– ب تنێ د 10 شەڤێن دووماهییێ یێن هەیڤا ڕه‌مه‌زانێ دێ دەرگەهێن مزگەفتان هەتا نڤێژا سپێدێ ڤەکری بن.
– ب تنێ پێشنڤێژ و گۆتارخویێنێ فەرمی یێ مزگەفتێ ماف هەیە مەراسیمێن ئایینی و تەراویحان ب تایبەتی ئەنجامبدەت.
– پابەندبوونا تەمام ب فەتوایا دیارکرنا نیسابێ زەکاتێ و كۆژمێ فترێ و فدیێ، کو ژلایێ جڤاتا بلند یا فەتوایا ئێكه‌تییا زانایێن ئایینێ ئیسلامێ ل کوردستانێڤە هاتیه‌ دیارکرن.
– پشتی بانگێ عه‌یشا 15 بۆ 20 خولەكان دێ نڤێژ هێتە ئەنجامدان، ژبەر ڕه‌وشا رۆژیگران، به‌رچاڤوه‌رگرتنا دەمێ گونجای ل درێژی و کورتیا تەراویحێ، کو ل سەر بنەمایێ شەرعی بهێتە ئەنجامدان.

– پێدڤییه‌ ڕێڤەبەریێن گشتی و ڕێڤەبەریێن ئەوقافێ چاڤدێرییا ڤان ڕێنماییان کەن.

– پێدڤییه‌ پابەندى بانگێ ڕێکخستی بن ل وان جهێن کو پرۆژێ بانگی ل وێرێ هاتیە بجهئینان.