جڤاتا وەزیرێن عیراقێ کۆمبوو و گۆتووبێژ لسەر بڕیارا سەرۆکێ ئەمریکا دەربارەی سەپاندنا باجا پێناسەیا گۆمرکی کر و چار ڕێکار دەربارەی ئەڤی بابەتی دەرخستن.
شەمبی 5ــی نیسانا 2025ــێ، جڤاتا وەزیرێن عیراقێ ب سەرۆکایەتیا محەمەد شیاع سوودانی کۆمبوو و گۆتووبێژ لسەر بڕیارێن دۆنالد تڕەمپ، سەرۆکێ ئەمریکا، دەربارە سەپاندنا باجا پێناسەیا گۆمرکی کر و بۆ ئەوێ مەرەمێ ژی بڕیار دا چار ڕێکارا بجهــ بینیت.
ڕێکارا ئێکێ تایبەتە ب پێشخستن و پێشڤەبرنا پەیوەندییێن بازرگانی یێن هەڤپشک، د چوارچووڤەیێ ڤەکرنا دەرگەهــ و بجهئینانا دابەشکرنێ و سازییێن بازرگانی یێن ئەمریکا، چالاککرنا سازییێن بازرگانی یێن عیراقێ، مامەلەیا بازرگانی یا ڕاستەوخۆ دناڤبەرا سکتەرێن هەڤشێوە یێن دناڤبەرا عیراق و ئەمریکا دا.
ڕێکارا دووێ، گرێدایە ب کارکرن بۆ پێشڤەبرنا خەزمەتگۆزاریا بانکی دناڤبەرا کەرتێ بانکی و دارایی ل عیراق و ئەمریکا، ب شێوەیەکی کو بجهئینانا بەرژەوەندیا ئابوورییا هەڤپشک مسوگەر بکەت.
ڕێکارا سێیێ، تیمێ دانوستاندنکار دگەل لایەنێ ئەمریکی بۆ دووڤچوونێ لسەر بنەمایێن پەیوەندییێن بازرگانی دگەل ئەمریکا، ب ئارمانجا باشترکرنێ و پشتڕاستبوون ل دانانا بنیاتێ پەیوەندییێن هەڤسەنگ یێن ئابووری و بازرگانی کو گەرەنتییا بەرژەوەندییا هەڤپشک دناڤبەرا هەردوو لایان دا بکەت، دێ هێتە ڕاسپۆاردن.
ل دووماهیێ ژی داخواز ژ وەزارەتێن دەرڤە و دارایی، بازرگانی کریە دگەل لایەنێن دی یێن پەیوەندیدار، گۆتووبێژەکێ دگەل هەڤپۆستێن خۆ یێن ئەمریکی بکەن بۆ پشتڕاستبوونێ ژ بهێزییا پەیوەندییێن بازرگانی و چاڤدێریکرنا بازارێن دارایی.
پێنجشەمبیێ، 3ـی نیسانا 2025ــێ، دۆناڵد ترەمپ، سەرۆکێ ئەمریکا بڕیارا سەپاندنا باجا گۆمرکی لسەر 180ــێ وەلات ئیمزاکر و ئاماژە کر و گۆت،” ددەمەکیدا کو ئۆرۆپا چ بەرهەمەکێ ئەمریکا هاوردە ناکەت، گۆرک یا لسەر مە سەپاندی، لەورا ئەم ژی ب ڕێژەیا 20% دێ گۆمرکێ لسەر ئۆرۆپا سەپینین.