ئەڤرۆ ب تنێ بەروارەک نینە، ب تنێ هێلەکا دی نینە کو لسەر روویێ دیرۆکێ هاتیە کێشان، ئەڤرۆ ڕۆژەکە دلێ مللەتەکی لبن گرانییا بیرهاتنان دا د لەرزیت، ئەو ڕۆژەیە کو ناڤێ “لەیلا قاسم” دبێژین نە بتنێ ب خەمڤە بەلکو ب رێزەکا رێزدار و حەزرەتا دەستلێدان ب میراتێ وێ یێ نەمر .
لەیلا قاسم بتنێ کچەک نەبوو، یاخیبونەکا فەلسەفی بوو، دەنگێ بێدەنگان بوو ،وژدانا دژوار یا گەلەکێ پارچە پارچە کریبوو، هەوارەکا جەستەیێ نیشتیمانەکێ بریندار بوو کو دەمەکێ درێژبوو لسەر نەخشەی هاتبوو لادان و سرکرن، ئەو بۆ هندێ ژدایک نەببوو خۆ ب دەستڤە بەردەت ئەو بۆ رۆهنکرنا رێیا مللەتەکی ژدایک ببوو، هەرچەندە ڕۆژا ل هنداڤی خانەقینێ ب سەر سەروچاڤێن وێدا د برسقی، بەلێ نە دشیا هەڤڕکییا وی ئاگری بکەت یێ کو دناڤ روحا وێدا د سۆت، ئاگرەک نەبوو ب تۆڕەیێ بەلکو ب پرەنسیپ د هاتە گەشکرن، نە کو ب تۆلڤەکرنێ بەلکو ب بینینی، لەیلا لدووڤ شەهیدبوونێ نە دگەریا ئەو لدووڤ ڕامانێ دگەریا و دگەریانا خۆدا گەشت دەربازکر و بوو روح بوو هێما.
ل دووماهیی دەمێن گەشتا خۆ یا تراژدی ،نە وەک قوربانیەکێ بەلکو وەک فەیلەسوف و جەنگاوەر وەک بونەوەرەکی کو وەهمێن جیهانا ماددی دەربازکربوون و چریسکا نە ڤەمریای یا هزران د هەمبێزا خۆدا گرتبوو، جەلادان هزردکر ژیانا ڤێ کچێ یا ب دووماهیئینای بەلێ ئەوا ب دووماهی هاتی ماسکێ دڕندەییا ئەوان بوو .
ئەی لەیلا ئەو کچا ب ئازادی بەرەڤ مرنێ چووی، توو بوویە وژدانا گەلەکی کو دناڤ سنووراندا بەرزەبوویە و دیرۆکێ غەدرە ل تە کریە .
تێگەهشتن ژ لەیلایێ تێگەهشتنە ل وێ چەندێ کو روحا مرۆڤی ل وی دەمێ ب ڕاستییێ زیندی دبیت، دبیتە تشتەکێ نەمر، روحا وێ روحەک بوو کو بۆ خۆ ڕادەستکرنێ دروست نەببوو، ب دەستێ نەدیتی یێ دادپەروەریێ پەیکەرساز کربوو.
ل دەمێ ڕاگەهاندی کوردستان ژ هەژی ژیانێ یە، مللەتێ وێ ژ هەژی هندێ یە ب زمانێ ڕەسەن یێ باب و باپیران ب ئاخڤن و ب ئازادی هەناسەیێ بدەن، وەکی ئێک نە د ئاخڤت وێ ئازارێن مللەتێ خۆ وێنە دکرن و ئەو ئازارە د گوهۆری بۆ دەستهەلاتێ.
بلا جیهان بزانیت ئەو کنفا هەناسەیا وێ خەندقاندی نەشیا راستیا ب خەندقینیت، ئەو دارستانە بۆ دارەکا پیرۆز کو بەرهەمێ شۆرەشێ لێ گەشە دکەت، لەیلا نەبوو بیرهاتنەک بەلکو بۆ هەلکەڤتەکا میتافیزیکی – ل چیایێن ئامێدیێ ل بەرێن دێرین یێن هەولێرێ هەست پێدهێتەکرن.
پێدڤییە ئەم یێن میراتگرێن قوربانیدانا وێ ب پرسین، ژیان د سیبەرا ژیانەکا ب ئەڤی ڕەنگیدا ڕامانا وێ چییە؟ ئانکو پێدڤیە کچێن خۆ نە بتنێ ب پەرتووکان پەروەردە بکەین بەلکو ب ئازایەتی، ئانکو پێدڤیە داهاتویەکی پەیکەرساز بکەین ئێدی لەیلا پێدڤی ب مرنێ نەبیت، چونکی ل دووماهییێ جیهانێ زانی ژبەر چ مر و دڤیا چ ببێژیت .
بلا ب ئاخڤتنەکا بێدەنگ ماتەمینیێ بوو نەکەین، بەلکوو ب کریارێن راستگۆیانە بلا ناڤێ وێ بتنێ لسەر کێلیا گۆری و لافیتەیان پیرۆز نەبیت، بلا لناڤ پۆلان دەنگڤەدەت لناڤ هۆلێن پەرلەمانی دەنگڤەدەت ب رەنگێ هۆزانان ببیتە هەلبەست، د چاڤێن وان زارۆیاندا یێن خەونان ب دەربەدەریێ نە ،بەلکو ب ڤەگەریانێ ڤە دبینن ب بریسقیت.
