د. محەمەد شوکری: دو کۆمپانی هاتینە راسپاردن گەنمێ جۆتیارێن هه‌رێما كوردستانێ وەربگرن

سەرۆکێ دەستەیا وەبەرھێنانێ ل حكومەتا ھەرێما کوردستانێ دیار كر: ئەڤ سالە بەغدا دێ رێژەكا کێم یا گەنمێ جۆتیارێن هەرێما كوردستانێ وەرگریت، لەوما حکومەتا ھەرێما کوردستانێ بریار دایە ئەو گەنمێ زێدە دبیت” كو رێژا وی گەنمی چەند بیت” دێ ھەموویێ ژ جوتیارێن ھەرێما کوردستانێ وەرگریت.

د. محەمەد شوکری، زێدەتر دیار كر: حکومەتا عێراقێ سالانە رێژەكا کێم یا گەنمێ جوتیارێن ھەرێما کوردستانێ وەرگریت و بەرھەمێ گەنمێ ھەرێما کوردستانێ” ژ ئەنجامێ گرنگیدانا حکومەتا ھەرێما کوردستانێ ب کەرتێ چاندنێ گەلەك زێدە بوویە، هەروەسا حکومەتا ھەرێما کوردستانێ بەردەوام بزاڤێ دكەت بۆ هندێ كو بەرھەمێ گەنمێ جوتیاران بازاری بۆ پەیدا بكەت، بۆ ئەڤ سالە ژی حكومەتێ بڕیار دایە” ئەو گەنمێ جوتیاران ھەیی و ئەوێ  بەغدا وەرنەگریت” ھەردو کۆمپانیێن قەیوان و خۆشناو ب بهایەكێ گونجایی دێ گەنمێ جوتیارێن هەرێمێ وەرگرن، هەر چەندە دێ وی گەنمێ باش وەرگرن و ئەوێ مفا ژێ بهێتە وەرگرتن.

ناڤهاتی گۆت ژی: وەرگرتنا گەنمێ جوتیارێن ھەرێما کوردستانێ ژ ئالییێ وان هەردو كۆمپانیانڤە” دێ لدووڤ ھندەک مەرج و رێنمایان بیت، بۆ هندێ گەنمەكێ باش بهێتە وەرگرتن و ئەڤ چەندە ل سەر داخوازییا حکومەتا ھەرێما کوردستانێیە و پار ژی گەنمێ جوتیاران هاتبوو وەرگرتن و ئەڤ چەندە دێ یا بەردەوام بیت، چونکی ئارمانجا حکومەتا ھەرێما کوردستانێ ڤەدیتنا بازارییە بۆ بەرھەمێ جوتیارێن هەرێمێ، لەوما ئەو هەردو کۆمپانییە هاتینە ڕاسپاردن” داكو گەنمێ جوتیاران وەربگرن.

ئەڤ سالە ژی حكومەتا عیراقێ بریاردایە ب تنێ ٤٠٠ ھزار تەنێن گەنمێ جوتیارێن ھەرێما کوردستانێ وەربگریت، هەر چەندە بەرھەمێ جوتیارێن ھەرێما کوردستانێ گەلەك ژ وێ رێژێ پترە و د نوكە جوتیارێن هەرێما كوردستانێ مژوولی رادەستکرنا ئەوی رێژا گەنمینە بۆ سایلۆیان، ژ ئالییەكێ دیترڤە حکومەتا ھەرێما کوردستانێ بریاردایە” ئەو رێژا گەنمی یا زێدە یا جوتیارێن هەرێمێ ھەموویێ ژێ وەربگریت.