ئیحسان ئامێدی
ژ کەڤن دا کوردستان هاتیە داگیرکرن و گەلێ وێ تووشی سیاسەتێن ڤەدەرکرن و چەوساندن و بەهژاندنێن نەتەوەیێن دەستهەلاتدارێن داگیرکەران بوویە، بێ بەهربوویە ژ ئاساییترین مافێن خۆ یێن مرۆڤی، لێ ژ بەرکو کورد مللەتەکێ زیندی و خۆراگربوویە، شیایە هەبوونا خۆ یا نەتەوەیی ب پارێزیت و بەرگرییێ و خەباتێ بکەت.
خەباتا چەکداری و شۆرەشێن ڕزگاریخوازێن نەتەوەیی، ڕێبازەکا دروستە و مافەکێ سروشتییێ مللەتێن بندەست و وەلاتێن داگیرکریە، لەوما ژی ژ کەڤندا کوردان شۆرەش و خەباتا چەکداری ژ بوونا ڕزگارییێ و ئازادییێ و ئاشتییێ کرینە.
دۆژمن و داگیرکەرێن کوردستانێ ب هەموو شیان و شێوازان ڕووبروو ماف و داخوازێن مللەتێ کورد بووینە، هەمیشە د ڕكەڤتی بووینە کو نە هێلن بزاڤين ڕزگاریخوازێن کوردستانێ ب ئارمانجێن خۆرا بگەهن.
نوکەژی و ل ڤی سەردەمی دۆژمن و داگیرکەرێن کوردستانێ ب ڕێکەفتن یان ب هەلکەفت یێ سیاسەتا ڤەدەرکرنا و پەراوێزکرنا کوردان ل پێش چاڤێن جڤاکێ نێڤدەولەتی و جیهانا ئازاد و ب پیرۆزکرنا هندەك جەمسەرين نێڤدەولەتی دهاژوون!؟.
ل عیراقێ، پشتی 100 سالێن خۆراگرییێ و خەبات و قوربانیدانێ، کوردستانی شییان قەوارەکێ نەتەوەییێ فیدرالی ئاڤاکەن، و پشتی 34 سالێن هەرێما کوردستانێ و 22 سالێن ڕۆخاندنا دکتاتورییەتێ و ئاڤاکرنا عیراقا دیمۆکراتییا فیدرالییا دەستوری، 20 سالێن پەسەندکرنا دەستوورێ هەمیشەیی، جارەکا دی دەستهەلاتدارێن بەغدا سیاسەتا پەراوێزکرنا هەرێما کوردستانێ دهاژون، دەستووری بن پێ دکەن، دیموکراتییەتێ و فیدرالییەتێ لێددەن، مافێن ڕەوایێن هەرێما کوردستانێ بنپێ دکەن، ئابلوقەیا ئابوری و دارایی ل سەر د دانن، مووچە و بودجەی لێ دبڕن، بزاڤا ژیانێ شەپرزەدکەن، خەلکی بێزار دکەن، ئارمانج ژێ بچووککرن هەرێما کوردستانێ و کێمکرنا دەستهەلاتێن وێیە، هاندانە بەرەف بەغدا و سەپاندنا سەروەرییا دەولەتا عیراقێ یە!.
ل سووریایێ، دەڤەرێن کوردستانێ پشتی ب دەهان سالان خۆراگرییێ و بەرخۆدانێ،14 سالێن گوری و قوربانیدانێ و ڕزگارکرنا ڕۆژئاڤایێ کوردستانی ژ دکتاتورییەتێ و داعشێ، چێکرنا ئیدارێن نافخۆیين، کار ژ بۆ ڤەگەراندنا ڕژێما ناڤەندییا سووریا عەرەبییە، ل بن ناڤێ سووریا ئێك دەولەتە و ئێك نەتەوەیە و ئێك حکومەتە و ئێك لەشکەرە، هەبوونا کوردان وەکو پيکهاتەکێ نەتەوەیێ مافدار دهێتە لێدان و پەرچقاندن، باسێن نەناڤەندییێ و ئوتونومی و فیدرالییەتی و هەڤپشکییێ دهێتە ڕەتکرن، کار ژ بۆ ژناڤبرنا ئیدارەیێن نافخۆیە!، پالدانە بەرەف دیمەشقێ و سەپاندنا سەروەرییا دەولەتا سووریا عەرەبی!.
ل تورکیا، سەرەرای خەبات و بەرخۆدانا کوردان یا سەدان سالان، ئەڤە 41 سالێن ڕەبەقە پەكەكە خەباتا چەکداری دکەت و قوربانییان ددەت بۆ کوردستانا مەزن!، ئەڤرۆ بۆ ئاشتییێ و دەولەتەك دیمۆکراتی خۆ هەلوەشاندن و چەکدانان!، چەك سوتن و پویچکرن!، ب گۆتنا کاربدەستين تورکیا، ژ چەککرن، یان دانەڤێ و خۆ بدەستڤەبەردانە، ژ بۆ هندەك چاکسازی و ئاشتییێ و ئاسایشا نافخۆییا تورکیایە! ئانکو ب خورتی بەرەف ئەنقەرە دبەن و سیاسەتا دەولەتا تورکیا د سەپینن!. بەلکی ئەوا ب شەری ب دەستڤەنەهاتی ب گفتوگویێ و ئاشتییێ ب دەستڤە بهێت.
ل ئیرانێ بزاڤا ڕزگاریخوازا کوردستانێ یا سەرکوتکریە، ل پشت کۆچك و تەنوران ژی باسێ وان ناهێتەکرن!. جاڤەرێ بووین ئەو حنگا ڤێ کەفتی ب هژینیت و دوزا کوردی ل وێرێ ژی سەرهلدەت!.
مخابن د دەمەکیدا ئەم چاڤەرێی هەلوەشاندنا قەوارێن دەستکرد و ل سەر نوو بهێنە ئاڤاکرن بووین، ئەڤە جارەکا دی ئێکەتییا وان دەولەتێن دەستکرد و داگیرکەر هاتە پیرۆزکرن و پاراستن و ڕژيمێن دکتاتوری و تاکرەو دهێنە پشتەڤانیکرن، ئێدی ئەو ناڤلێنانێ ڕۆژهەلاتا ناڤینا مەزن، روژهەلاتا ناڤینا نوو، دیمءکراتیکرنا ڕۆژهەلاتا ناڤین، سەقامگیرییا دەڤەرێ دڤی بارودوخێ پەقینێدا، د وارێ کریاری دا چ تشتەك باش د بەرژەوەندا کوردستانێدا خۆ نیشا نەدان تنێ گوهورینا هندەك دەستهەلاتان و هێزا بوویە، ل جوگرافیا سیاسی هەر تشتەك وەکو خۆ مایە، نەدیرە ئەڤە بازارەکێ هەرێمایەتی و نێڤدەولەتی بیت بۆ لێدانا هەموو هێز و بەرەیێن بەرگریێی، داکو چارەسەریێن ناڤەندی دگەل حکومەتێن ناڤەندی بهينەکرن، لەوما ژی بەرێ سەرکردەیێن کوردان ژی دەنە پایتەختێن دەولەتێن داگیرکەر و وەسا نیشا ددەن و خۆیادکەن ڕێیا چارەسەرییا هەر پارچەکا کوردستانێ پایتەختێ دەولەتا داگیرکەرا وێ یە!، بەغدا و دیمەشق و ئەنقەرە و تەهران!.
پێدچیت پیلانەکا نهێنی هەبیت، بۆ پاشڤەبرنا کوردستانێ، کوردستان ئێخستیە د هەلنگڤتنەکێدا، هیڤیمە ئەز یێ شاش بم وەسا نەبیت!، نەمازە کورد بووینە ئەو هێز یا حساب بۆ دهێتەکرن و گفتوگو دگەل دهێتەکرن بۆ چارەسەرکرنا گرفتان دچارچوڤێ دەولەتێدا.
گوهورینا شێوازێن خەباتێ و گونجاندن دگەل پێتڤیێن سەردەمیانە پێناڤی مافێن ڕەوایێن مللەتی سروشت یە، هەکە نە ل سەر کیستێ مافێن مللەتی و بەرژەوەندێن گشتی و خوینا شەهیدان بیت.
دڤێ هەڤکێشەیێدا، پێگەهـ و سەنگا کوردان ل ئاستێ خەبات و قوربانیدانا وان ناهێتە نیشادان، دیارە گوهۆرینا دیمەنێن ڕژێمان عەقلیەتا جاران نەگوهۆرییە!، ئەڤە مەترسییەکا پێشجاڤە خۆ چەند بارە دکەت.
دیارە بەرژەوەندێن دەولەتان ب بهاترن ب بەهایێن مرءڤی و پرانسیبێن مافێن مرءڤی و بریارێن چارەنووسیێن گەلان!.
هندەك جاران ئالوزی و ئاستەنگ ڕێگرن هەمبەری پێشڤەچوونێ، خرابە و خراپترە، ژ بێ ڕێیێ، خراب دبیتە بژاردەکا نەچارییا تەحل، هندی زیان کێمتر بن باشترە!. لێ هەر دێ مینیت کورد و کوردستان دوزەکا نەتەوەییا زیندی، تا مافين وێ یێن ڕەوا دابین نەبن، ئاشتی و ئاسایش و سەقامگیری جێگیر نابن و هەموو لایەنێن دێ د زەرەرمەند و زیان ڤيکەفتی بن.
دڤێت هەموو جیهان بزانیت چ ئاشتییەك و ئاسایشەك و سەقامگیرییەك ل ڕۆژهەلاتا ناڤین چێنابیت بێی چارەسەرییەکا دادپەروەرانە یا دوزا نەتەوەیا کوردستانێ.
کورد د خاستینە خۆ بهێز بێخن، دا ڕولێ خۆ د گوهؤریناندا ببینن و بەرژەوەندێن کوردستانێ بجهبینن.
ب هیڤ نە کوردستان خۆ ڕاگریت و خۆ ڤەگریت و ل سەرخۆ بیت و خۆ ڕێکبێخیت، ڕێیێن خۆ ڤەوژێریت و ڕاستڤەکەت و بەرەف سەنتا دروست بچیت و ئاشتییێ و ئازادییێ و سەقامگیرییێ ب دەست ڤە بینیت، دڤی دەستوداریدا ئەوا باشە بۆ کوردستانێ ب دەستڤە بهێت، هەر چ نەبیت ب ئاشتیانە کێشە بهێنە چارەسەرکرن و ببنە هەڤپشکێن ڕاستەقینە د وان دەولەتاندا، ب مافێن خۆیێن ڕەوا شاد ببن.
