نێچیرڤان بارزانی: ئه‌ركێ حكومه‌تا عیراقێيه‌ خۆ ل ئێزدییان بكه‌ته‌ خودان

نێچیرڤان بارزانی، سه‌رۆكێ هه‌رێما كوردستانێ ئه‌ڤرۆ د سالڤەگەڕا 11ـێ یا کۆمکوژییا کوردێن ئێزدیدا ل هەولێرێ ڕاگه‌هاند، ئه‌وان پشته‌ڤانییا خۆ بۆ وه‌لاتییێن ئێزدى دووپاتكر و دیاركر، ئەو نه‌ بتنێنه‌، وه‌كو هه‌رگاڤ دێ دگه‌ل وانبن و ئێش و ژانێن وان ژبير ناكه‌ن.
دیار ژی كر، هه‌رێما كوردستانێ د ڕه‌وشه‌كا گران و دژواردا، ده‌رگه‌هێن خۆ بۆ هه‌موو پێكهاتێن عیراقێ ڤه‌كرن كو ژ ده‌ستێ تيرۆرێ و توندوتيژيیێ دڕه‌ڤين و دهاتنه‌ كوردستانێ، ئه‌ركێ حكومه‌تا عیراقێيه‌ خۆ ل وه‌لاتییێن خۆ يێن ئێزدى بكه‌ته‌ خودان و به‌رپرسيارييا حكومه‌تا عیراقێيه‌ ڕێ نه‌ده‌ت شنگال و ده‌ڤه‌رێن دى يێن ئێزدييان، مه‌يدانا ڤه‌كرى يا گرۆپێن چه‌كدار و ميليشيبان بن، به‌رده‌وامیيا ڤێ ڕه‌وشێ زوڵمه‌كا مه‌زنه‌ ل ئێزدييان دهێته‌كرن.
سه‌رۆكێ هه‌رێما كوردستانێ دیاركر، ئه‌و داخواز بجهئینانا ڕێككه‌ڤتنا حكومه‌تا هه‌رێما كورستانێ و حكومه‌تا عیراقا فيدرال بۆ ئاساييكرنا ڕه‌وشا شنگالێ دكه‌ن، ئه‌ركێ جڤاكا ناڤده‌وله‌تييه‌ د هه‌وارا ئێزدييان بهێت.