ئێزدی ژبەر كوردبوون و بیروباوەرێن خۆ یێن ئایینی، كەڤتنە بەر كەرب و بێ وژدانییا داعشێ

سەرۆك بارزانی پەیامەك ب هەلكەڤتا 11 سالییا جینوسایدا كوردێن ئێزدی بەلاڤكر.
دەقێ پەیاما سەرۆك بارزانی:
ب ناڤێ خۆدایێ مەزن و دلوڤان
ئەو تاوانا تیرۆرستێن داعشێ 11 سالان بەری نوكە ل دژی خووشك و برایێن مە یێن ئێزدی كری، تاوانەك بوو هەموو سنوورێن نەمەردینییێ و دڕندەییێ دەربازكرن، ئەڤە ئازارەكە چ جاران ژبیرا مە ناچیت، قەدەرا گەلێ كورد ئەوە بوویە كو هەردەم دوژمێن دلڕەق و بێ وژدان هەبوویە، كارەسات ل دووڤ كارەساتێ بەر ب گەلێ كوردستانێ هاتینە، ئەوا ل دژی خووشك و برایێن ئێزدی هاتییە ڕوودان، درێژەپێدانا ئەوان كارەساتایە یێن ل دژی گەلێ كوردستانێ هاتینە كرن. ل دەڤ هەموو كەسان یا دیارە ئێزدی ژبەر كوردبوون و بیروباوەریێن خۆ یێن ئایینی، كەڤتنە بەر كەرب و بێ وژدانییا تاونبارێن داعشێ و هاتنە جینۆسایدكرن.
پشتی ڕوودانا ئەوێ كارەساتێ ل سەر دەستێ تیرۆرستێن داعشێ، گەلێ كوردستانێ و پێشمەرگە ب دل و گیان دگەل خووشك و برایێن خۆ بوون، ئەوا بۆ ئازادكرنا ئاوارەیان و ئازادكرنا شنگالێ و چیایێ شنگالێ ژ دەست هاتی، یا بجهئینای.
ل ڤێرێ ڕوولێ هێزێن پێشمەرگەیێ كوردستانێ و هەموو ئەوان قارەمانان بلند د نرخینن یێن مێژوویەكا پرشەنگدار تۆماركری، بۆ ئازادكرنا چیایێ شنگالێ وشنگالێ خوین ڕێشتی، تۆل ژ تیرۆرسێن داعشێ ڤەكری و تیرۆرستییا وان ئێخستییە بن پێن ئێزدییان، هەروەسا گەلەك سوپاسییا هێزێن هەڤپەیمانان دكەین كو دهاریكاریكرنا پێشمەرگەیدا و شكاندنا داعشێ ڕۆلەكێ بەرچاڤ دیتی.
ل 11 سالییا كارەساتا شنگالێ، سلاڤان بۆ گیانێ شەهیدان و قوربانییێن ئەوێ تاوانێ و هەموو تاوان و كۆمەلكۆژییان د هنێرین، یێن ب سەر گەلێ كوردستانێدا هاتین، پێدڤییە دەولەتا عیراقێ قەرەبوویا قۆربانییێن كارەساتا شنگالێ و هەموو وان جینۆسایدا بكەت، یێن د دەرحەقێ گەلێ كوردستانێدا كرین، دڤێت دووماهییێ ب وان هزر و ڕەفتارێن شۆڤینی بینیت، یێن هەر جار و ب بهانەیەكێ و ب عەقلەتییەكا نەمرۆڤانە، گەلێ كوردستانێ پێ ئازار د دەن.