ب مەرەما پاراستنا کلتۆرێ کوردی بۆ جیھانێ دەستەیا گەشتوگوزارا هەرێمێ رێنمایەك دانایە

رێڤەبەرێ بازارکرنێ ل دەستەیا گەشتوگوزارا ھەرێما کوردستانێ دبێژیت: بۆ پاراستن و ناساندنا کلتۆرێ ھەرێما کوردستانێ بۆ وەلاتان، ل جهێن گەشتیاری وەكو مەرجەكی و پێدڤییە بەرھەم و کارێن دەستی یێن ناڤخۆیی بهێنە نیشاندان و ل ھەموو دەڤەران مۆرکا کوردی پێڤە دیار بیت، هەكە ئەو چەندە نەهێتە كرن” دێ لێپرسین ل گەل دا هێتە كرن و دڤێت هەموو كەڤال و مینۆیێن خوارنێ ب زمانێ كوردی بهێنە نڤێسین.

سیروان تۆفیق، رێڤەبەرێ بازارکرنێ ل دەستەیا گەشتوگوزارا ھەرێما کوردستانێ” زێدەتر بۆ ئاژانسا خانی دبێژیت: ئێک ژ مەرجان ل جهێن گەشتیاری یێن ھەرێما کوردستانێ ب  تایبەتی بۆ ئۆتێلێن پێنج ستێر، پێدڤییە تابلۆیان ب زمانێ کوردی ب هەلاویسن ل جهێ تابلۆیێن زمانێن دیتر و ژ لایێ موزیک و سترانێن کوردیڤە” بزاڤ هاتینە كرن” پترین موزیک و سترانێن فۆلکلۆرێ کوردی بۆ گەشتییاران بهێنە هەلكرن، بۆ کارێن دەستی و بەرھەمێن ناڤخۆیی ژی” مە خۆلەك بۆ ٣٨٠ کەسان ڤەكرییە” ئەوێن د بیاڤێ كارێن دەستیدا کار دکەن ل دەڤەرێن گەشتیاری” ئەڤ چەندە ب هاریكارییا رێکخراوەكا ئەلمانی و یونسکۆ بوویە، نوكە ئەو كەسە ھەموو ل دەڤەرێن گەشتیاری کارێن دەستی نیشان ددەن و ھەموو ژی کچ و کورن.

سیروان تۆفیقی گۆت ژی: ئەو کەسێن دناڤا وان خۆلان دا كاركری، کارێن دەستی یێن تایبەت ب کوردەوارییێ ڤە چێدکەن وەکو دروستکرنا فەرش و تزبیان و جوانکارییێن ژنان و چەندین سەنتەر و ناڤەند ژی مە ھەنە” ئەو ژی وی کاری دکەن، داكو وان كارێن دەستی بفرۆشنە گەشتیاران، ئارمانجا مە ژ وی كاری ناساندنا کلتۆرێ کوردستانێ یە ب ئایین و ئایینزایێن جودا کو سەرەدانا ھەرێما کوردستانێ دکەن، بۆ هندێ ئەوێن دهێنە ھەرێما کوردستانێ، یادگارییەكا ڤێرێ ل گەل خۆ ببەنە وەلاتێ خۆ، چونکی ئەڤە ل ھەموو وەلاتان ھەیە و ئێکە ژ کارێن مە و ئەڤە گرنگیدانە ب بەرھەمێن خۆمالی و بازارکرنا وان” هەروەسا ئەوێن وان مەرجان بنپێ بكەن، دێ لێپرسین ل گەل دا هێتە كرن و پێدڤییە پابەندی ئەوان بریاران بن.