شەهیانا ب کۆم ئەوە دەمێ ژمارەیەکا زۆر یا کچ و کوڕان د مەڕاسیمەکا بەرفرەهـ دا ژیانا هەڤژینیێ پێکدئینن، ئەڤەژی نە ب تنێ هەلکەڤتەکا ئاساییە بەلکو ئاهەنگا ئێکگرتن و دلسۆزی و بەرپرسیارەتییا جڤاکی یە.
گەلەک جاران د جیهانا نوکەدا، مەزاختییێن پێكئینانا هەڤژینییێ دبنە بارگرانی بۆ گەنجان، ژبەر ئەڤێ چەندێ ژی ئەڤ شەهیانێن ب کۆم دەلیڤەیێن دلخۆشکەر و باش پێشکێشی گەنجان دکەن. کێم خەرجیێن پێکئینانا هەڤژینیێ، رێکێ ب هەڤژینێن تازە ددەت خۆ ژ دەینکرن و بارگرانیێ دووربگرن، ئەڤە ژی دێ بیتە رێخوشکەرەک، کو ب خۆشی دەست ب گەشتا خۆ بکەن.
ئێک ژ مفایێن سەرەکی یێن شەهیانێن ب کۆم، ئاڤاکرنا ئێکگرتنێ یە دناڤ جڤاکیدا. ئەڤە دبیتە ئەگەر، کو پەیوەندیێن خێزانی ژ هەمی تەخ و چینێن جودا جودا، بهێنە دروستکرن و ببنە ئەگەرێ بەڵاڤکرنا باوەری و هاریکاری و پشتەڤانی و هەڤسەنگی و رێزگرتنێ دناڤ جڤاکیدا.
ئاهەنگێن ب ڤی رەنگی، هەستێ سەرخەبوونێ دروست دکەن و پەیوەندییێن خزمانیێ بهێزتر دکەن. هەروەسا بۆ مە دیار دبیت، کو خۆشییا هەڤپشک گرنگترە ژ تشتێن گرانبها یێن تاکە کەسی و هاندانا کەلتورەکی یە، کو حەزژێکرن و پێگیربوون بهاتربن ژ هەر دیاردە و نماییشەکا ماددی.
هەرەوسا شەهیانێن ب کۆم، رۆلەکێ گرنگ د پشتەڤانیکرنا هەڤژینێن کێم دەرامەتدا هەیە، کو چێدبیت رەوشا وان یا دارایی ببیتە ئەگەر و هەڤژینییا وان بهێتە پاشئێخستن یان هەتا دەست ژ پرۆسەیا هەڤژینییێ بەردەن. دابینکرنا پێدڤییێن سەرەکی وەکی جهێ ئاهەنگێ، خوارن و رێکخستنا رێورەسمان، دێ بیتە ئەگەر، کو پرۆسەیا هەڤژینییێ ب ساناهی و بێ مەزاختنێن زێدە برێڤەبچیت و بڤی رەنگی جڤاک دێ پشتڕاستبیت، کو هەمی کەسان دەلیڤە هەیە ئاهەنگێ بۆ ڤێ رۆژا خۆ یا تایبەت ب ئێکسانی و شانازی ڤە بگێرن. هەلکەڤتێن ب ئەڤی رەنگی سەرەرای بجهئینانا خەونێن کەسی، ب رەنگەکێ جوان ژی نەریتێن کەلتوری بلند دنرخینیت.
ل دووماهیێ، شەهیانێن ب کۆم نوونەرایەتیا تێکەلەیەکێ جوان یێ نەریت و بەخشندەیی و روحی یێ جڤاکی دکەن. هەمی ئەو ئاستەنگێن دارایی بۆ ژیانا هەڤژینییێ دهێنە پێشییا مە ل بەر وان گەنجان دهێنە ساناهیکرن، پەیوەندیێن جڤاکی بهێزدکەن و د ئینیتە بیرا مە کو حەزژێکرن بهێزترە دەمێ خەلک پتر نزیکی ئێک ببیت و خۆشیێ نە ب تنێ بۆ دو ئەڤینداران دروست بکەت بەلکی خۆشیێ ب دەتە هەمی جڤاکی.
هەروەسا ژ هەژی ئاماژێیە، کو ب بڕیارا سەرۆک مەسعود بارزانی، سالانە وەکو نەریتەک ل رێککەفتی 16ـی تەباخێ، ژیانا هەڤژینییێ بۆ 450 گەنجان پێک بینن.
