سەرۆك بارزانی پەیامەك ب هەلكەڤتا سالیادا دامەزراندنا ئێكەتییا زانایێن ئایینێ ئیسلامێ ل كوردستانێ بەلاڤكر
دەقێ پەیاما سەرۆك بارزانی:
ب هەلكەڤتا 55سالییا دامەزراندنا ئێكەتییا زانایێن ئایینێ ئیسلامێ ل كوردستانێ، پیرۆزباهییێن گەرم ل سەرۆك و ئەندامێن مەكتەبا تەنفیزی و جڤاتا ناڤەندییا ئێكەتییا زانایان و هەموو مامۆستایێن ئایینێ پیرۆزێ ئیسلامێ ل كوردستانێ دكەم.
دامەزراندنا ئێكەتییا زانایێن ئایینێ ئیسلامێ ل كوردستانێ ل سەر ڕاسپاردەیا بارزانییێ نەمر پێنگاڤەكا مێژوویی بوو ب ئاراستەیێ ب هێزكرنا ڕۆلێ مامۆستایێن ئایینی ل شۆرەش و خەباتا گەلێ مە، ئەڤ بریارە دووپاتكرن بوو ل سەر پێگەهێ مامۆستایان و مەزنە زانایێن كوردی یێن ئایینێ ئیسلامێ د بەلاڤكرنا تێگەهشتنا نەتەوەیی و نیشتیمانپەروەری و پێكڤەژیانێدا ل ناڤ تەخ و چینێن كۆمەلگەهێ، ڕۆل دیتن د پێشڤەبرنا دۆزا ڕەوا یا گەلێ مە د هەموو قووناغاندا.
ل هەلكەڤتا دامەزراندنا ئێكەتییا زانایێن ئایینێ ئیسلامێ ل كوردستانێ، هیڤییا سەركەڤتنێ بۆ ئێكەتییا زانایێن ئایینێ ئیسلامییێن كوردستانێ و هەموو مامۆستایێن ئایینی یێن بەرێز دخوازم، دەستخۆشییێ ل وەستیان و ئەركێ وان یێ پیرۆز دكەم.
خودایێ مەزن پشت و پەنایێ مە هەموویان بیت.
مەسعود بارزانی
21ی ئەیلوولا 2025ێ
