سەرۆك بارزانی: هیڤیدارم ب زووترین دەم شەڕ و ئالۆزییێن سووریا بهێنە ڕاگرتن

سەرۆك مەسعود بارزانی پەیامەك ل دۆر گوهۆرینێن سووریا بەلاڤكر و ڕاگەهاند، ئەوان دووهی كۆمبوونەكا هەڤپشك یا گرنگ دگەل هنارتییێ تایبەتێ سەرۆك ترامپی بۆ كاروبارێن سووریا و فەرماندەیێ گشتییێ هێزێن سووریا دیموكرات و سەرۆكێ ئەنەكەسێ هەبوو.

سەرۆك بارزانی دیاركر، هیڤییا وان ئەوە ب زووترین دەم ئەو شەڕ و ئالۆزییە بهێنە ڕاگرتن یێن نوكە دناڤبەرا هێزێن حكومەتا سووریا و هێزێن سووریا دیموكراتدا هەین، هەموو لایەن ڤەگەرنە وێ ڕێككەڤتنێ یا پێشتر بۆ چارەسەركرنا ئاریشەیان و گەهشتن ب سەقامگێرییێ دناڤبەرا لایەنێن سووریادا هاتییە كرن.

هەروەسا دیاركر، دەركەڤتنا مەرسوومێ سەرۆكێ سووریا ل دۆر مافێن كوردان ب پێنگاڤەكا ئیجابی و ئاراستەیێ دروست دزانن، هیڤیدارە ئەو مەرسوومە ببیتە زەمینەیەك بۆ هندێ ب ڕازیبوونا لایەنێن پەیوەندیدار دەولەمەند ببیت، ب شێوەیەكێ قانوونی و دەستووری گەرەنتییا مافێن گەلێ كورد بكەت.