وەزارەتا بەرگرییا سوورییێ راگەهاندنەك بەلاڤكر

وەزارەتا بەرگرییا سوورییێ دبێژیت، هێزێن وان ناچنە دناڤ گوند و باژێرێن کوردان دا و “ئەم بەرهەڤین کەمپا هۆلێ وەربگرین”.
وەزارەتا بەرگرییا سوورییێ داخوازێ دکەت کو هێزێن سووریا دیموکرات (هەسەدە) رێککەفتنا ١٨ی کانوونا دووێ بجهـ بینیت.
دەقێ راگەهاندنا وەزارەتا بەرگرییا سوورییێ؛
ئەم بەرهەڤیا خۆ یا تەمام رادگەهینین بۆ وەرگرتنا کەمپا هۆلێ و هەموو زیندانێن “داعشێ” ل دەڤەرێ، هەروەسا پێشەنگیا کارێن مە بەرهنگاربوونا داعشێ یە، مە رەتکریە کو دۆسیەیا زیندانییان وەک بارمتە یان کارتا فشارێ یا سیاسی ژ لایێ سەرکرداتیا “هەسەدێ” ڤە بهێتە بکارئینان بۆ بەلاڤکرنا ئالۆزیان و تێکدانا سەقامگیرییێ.
داخوازێ ژ سەرکرداتیا “هەسەدێ” دکەین پابەند بیت ب پەیمانێن خۆ و رێککەفتنا ١٨ی کانوونا دووێ ب شێوەکێ بەلەز بجهـ بینیت.
تەكەزییێ ل سەر پابەندبوونا خۆ یا رەها دکەین بۆ پاراستنا گەلێ مە یێ کورد و پاراستنا ئاسایشا وان، دوبارە سۆزێ ددەین کو هێزێن مە ناچنە ناڤ گوند و باژارێن كوردان دا؛ چونکی سوپا قەلغانەکە بۆ هەموو سوورییان و ئارمانجا وێ ڤەگەڕاندنا سەقامگیرییێ و پاراستنا سازییێن حکومییە.