نێچیرڤان بارزانى، سەرۆکێ هەرێما کوردستانێ ب هەلکەفتا ڕۆژا جیهانى یا ئافرەتان (8ی ئادارێ) پەیامەک بەلاڤکر.
دەقێ پەیاما نێچیرڤان بارزانى:
“ب هەلکەفتا هەشتی ئادارێ، ڕۆژا جیهانىیا ئافرەتان، ب گەرمی پیرۆزباهییێ ل ئافرەتێن کوردستانێ، عێراقێ و جیهانێ دکەم، هیڤیا سەرکەفتنا بەردەوام و پێشەنگییێ بۆ وان دخوازم د کاروانێ وان یێ پڕی شانازی دا بۆ ب دەستڤەئینانا دادپەروەری و یەکسانیێ.
ئافرەتان ل کوردستانێ ب درێژاهییا دیرۆکێ دا ڕۆلێ شۆرەشگێڕی و ئاشتیخوازانە گێڕایە و ئازایەتی و خۆڕاگرییا بێ وێنە سەلماندیە، نوکە ژی کو هەرێما کوردستانێ د قووناغا ئاڤاکرن و ب هێزکرنا سازییان دایە، ئامادەبوونا کارا یا ئافرەتان د هەموو وارێن سیاسەت، پێشمەرگایەتی، ئابۆرى، ڕێڤەبرن و پەروەردێ دا، جهێ شانازیا مە یا مەزنە.
د ڤێ یادا پڕ شکۆ دا، ئەم تەكەزییێ ل سەر وێ چەندێ دکەینەڤه کو ئاڤاکرنا جڤاکەکێ ئارام و سەقامگیر و پێشکەفتی، بێ مسۆگەرکرنا تهمامیا ماف و ئازادیێن ئافرەتان و ب هێزکرنا پێگەهێ وێ د هەموو وارێن بڕیاردانێ دا، نابیت، وەک هەر جار ئەم پابەندین ب چەسپاندنا کلتوورێ یەکسانی و دادوەرییێ و بنبڕکرنا هەموو جۆرێن جوداکاری و توندوتیژییێ کو بەرامبەر ژنان دهێنە کرن، چ د ناڤ خێزانێ دا بیت یان ژی د جهێن گشتی دا.
پاراستنا شکۆ و مافێن ئافرەتێ بەرپرسیاریەتەکا هەڤپشک یا حکومەت، خێزان، جڤاکێ مەدەنی، میدیا و هەمی سازیێن جڤاکی، پەروەردەیی و ئایینی یە، کار و ستراتیژیێن نوو د پێدڤینە داکو وار و دەلیڤێن یەکسان بۆ ژنان پەیدابن داکو ڕۆلەکێ کاراتر د دارشتنا پاشەڕۆژا وەڵاتی دا هەبیت. دێ هەر کوردستان نموونەکا گەش بیت د وارێ یەکسانی و ڕێزگرتن ل مافێن مرۆڤی و پاراستنا ئافرەتان ژ توندڕەوی و توندوتیژیێ.
د ڤێ ڕۆژێ دا، ب ڕێزڤە یادا هەموو وان ئافرەتێن خەباتكەر دکەینەڤه کو ژ پێخەمەتی ئازادی و دادوەری و مافێن خۆ یێن ڕەوا دا قوربانیێن مەزن داینە، سلاڤ بۆ گیانێ پاقژێ هەموو وان خانمێن بووینە قوربانیێن توندوتیژییێ، یادا وان هەر ب خێر بیت.”
