ئەڤرۆ دوشەمبی، 16ی ئادارا 2026 ێ، مەسرور بارزانی، سەرۆکێ حکومەتا هەرێما کوردستانێ، د 38ەمین سالڤەگەرا کیمیابارانا هەلەبجە دا پەیامەک بەلاڤکر و تێدا دیار کر، پێدڤییە حکومەتا فیدرالی بەرپرسیارەتییێن خۆ یێن یاسایی و دەستووری بجهبینیت و کەسوکارێن قوربانییان قەرەبوو بکەت.
دەقێ پەیاما سەرۆکێ حکومەتێ:
د (38)مین سالڤەگەڕا کیمیاباران و کۆمەلکوژیا باژێڕێ هەلەبجە دا، ب ڕێز و شکۆڤە یادا شەهیدێن بێتاوانێن ڤێ کارەساتا مەزن دکەین کو بەرامبەر خەلکێ کوردستانێ هاتە ئەنجامدان و ئارمانجا وان قڕکرن و جینۆسایدکرنا گەلێ کوردستانێ بوو.
کیمیابارانا هەلەبجە هەردەم برینەکا کوورە د دیرۆكا مەدا و نیشانەکا دیار و ڕوونا وێ ستەمکاری و زۆرداریێیە یا کو ل دژی خەلکێ کوردستانێ هاتیە ئەنجامدان.
نابیت ئەڤ تاوانا هووڤانە چ جاران ژ بیرا خەلکێ کوردستانێ و مرۆڤایەتییێ بچیت، پێدڤییە خەلکێ کوردستانێ ژ بیر نەکەت کو ئەڤ دەستکەفتێن ئەڤرۆ ل هەرێما کوردستانێ ب دەستڤە هاتین، بەرهەمێ خوینا شەهیدێن سەربلندێن کوردستانێنە و دێ ب هەموو شێوەیان پارێزگارییێ لێ کەین.
د ڤێ بیرەوەرییا خەمگیندا، جارەکا دی ژی بیرا حکومەتا فیدرالی دئینین کو پێدڤییە ل ئاست بەرپرسیارەتیا یاسایی و دەستووریا خۆ بیت و ب شێوەکێ شایستە، بنەمال و کەسوکارێن سەربلندێن شەهیدێن هەلەبجە و ئەنفالکرییان و هەموو قوربانیێن دی یێن دەستێ ڕژێما بەعس یا بەری نوکە یا عێراقێ قەرەبوو بکەت.
سەرێ ڕێز و نەوازشێ بۆ گیانێ پاقژێ شەهیدێن هەلەبجە و هەموو شەهیدێن کوردستانێ دچەمینین.
