به‌هدینان رێز ل دكتۆر ئازاد نه‌جار گرت

پارێزگا‌رێ دهۆكێ ئه‌ڤرۆ سپێدێ، پێشوازی ل دكتۆر ئازاد نه‌جار، داهێنه‌رێ كورد یێ  چێكرنا دلێ ده‌ستكرد كر و خه‌لاتێ رێزلێنانێ پێشكێشكر.

دكتۆر عه‌لی ته‌ته‌ر، پارێزگارێ دهۆكێ ئه‌ڤرۆ پیشوازی ل دكتۆر ئازاد نه‌جار كر  و ب ناڤێ خوه‌، كارگێریا پارێزگه‌هێ و خه‌لكێ دهۆكێ پیروزباهى وده‌ستخۆشى ل دۆر داهێنانا وى  و چێكرنا دلێ ده‌ستكرد  كر وگۆت: ئه‌و داهێنانه‌ جهێ سه‌ربلندیێ یه‌ بۆ هه‌ر تاكه‌ كوردستانییه‌كی وخواست نمونێن وه‌كو دكتورى ل وه‌ڵاتى پتر په‌یداببن.

پارێزگارێ دهۆكێ  ته‌كه‌زكر، سه‌رۆكێ حكومه‌تا هه‌رێمێ و سازیێن وێ به‌رده‌وام بزاڤان دكه‌ن كو زه‌مینێ ل هه‌مبه‌ر داهێنه‌ر وخودان شیانان خۆشكه‌ن ژ بۆ وێ یه‌كێ هه‌رێما كوردستانێ پێشبێخن وپتر مفاى ژ زانست وته‌كنولوجیا نوو  وه‌رگرن، هه‌روه‌سا سیسته‌مێ زانستى یێ پێشكه‌فتى لناڤا زانكۆیێن هه‌رێمێ ب چه‌سپینین كو پتر داهێنان بهێنه‌ كرن.

ل داویێ ژی  پارێزگارێ دهۆكێ خه‌لاته‌كێ رێزگرتنێ پێشكێشى د.ئازاد نه‌جار كر كو داهێنان و سه‌ركه‌فتنێن مه‌زن ل سه‌ر ئاستێ جیهانی كری.

دكتۆر.ئازاد نه‌جار سوپاسیا سه‌ركرداتییا هه‌رێمێ وپارێزگارێ دهۆكێ كر ل دۆر بزاڤێن وان ژ بۆ پێشئێخستنا سیسته‌مێ زانستى ل زانكویێن كوردستانێ وته‌كه‌زكر كو ب كار ئینانا ته‌كنولوجیا نوو ودانانا به‌رنامێن ستراتیجى فاكته‌رێن  سه‌ره‌كینه‌ ژ بۆ پێشئێخستنا هه‌ر بیاڤه‌كێ زانستى ل هه‌رێمێ  وبه‌رهه‌ڤیا خوه‌ دیاركر بۆ پشته‌ڤانیكرنا هه‌موو چالاكیێن زانستى ل كوردستانێ ب تایبه‌ت چێكرنا سازییه‌كا تایبه‌ت بۆ كه‌سانێن داهێنه‌ر .