گروپه‌كێ سەر لێشێوایی و ده‌ركه‌فتى ژ قانوونێ، ل پەنایا حەشدا شه‌عبی و ب ئیمكانات و ئیمتیازات و بەرگێ ئەوان، ل ده‌مژمێر ٩:٣٠ خولەکا شەڤا بورى، رێكەفتى ١٥ ل سەر ١٦ شواتا ٢٠٢١، ب مەبەستا تێكدانا سەقامگیری و ئاسایش و ئارامییا پایتەختێ هەرێما كوردستانێ، ترسنۆكانە چەند موشەكه‌ك ئاراستەی ناڤا شارێ هەولێرێ كرینه، كو بوویە ئه‌گه‌رێ زیانێن مرۆڤی و مادی، نیگەرانکرنا ئاكنجیێن سڤیل یێن هەولێرا هۆلاكۆ بەزین.
ئه‌م وه‌كو پارتی یا دیموكراتا كوردستانێ، سه‌ره‌راى ئیدانەکرنا وێ كریارا تیرۆرستى یا پیس، داخوازێ ژ حكومەتا فیدرالی یا ئیراق و هه‌ڤپەیمانییا نێڤدەولەتی و ب تایبه‌تى ویلایەتێن ئیكگرتى یێن ئەمریكا دكەین، سەرەرای ئیدانەكرنا ڤێ كریارا دوژمنكارانە ب له‌ز ڤه‌كۆلین و دووڤچوونێ بکەن و لایەنێ بەرپرسیار ل دووڤ قانوونێ بگه‌هیته سزایێ خوه یێ پێدڤى، ب مخابنى ڤه ئەڤ كریارە بۆ چەندەمین جاران دوبارە دبن و ژ ئه‌نجامێ نه‌گه‌هاندنا سزایێ وان، تاقمێن تێکدەر جورئەتا هندێ پەیدا دكەن ل سەر كارێن تیرۆریستی بەردەوام بن.
یا ڤه‌شارتى نینه و ب روونی دزانین کو عەقلیەتا ڤى تاقمێ فاشست و دوور ژ هزرا سەردەمیانە، چاڤێ وان پێشكەفتن و ئارامی و خۆش ژیانا ئاكنجیێن هەرێما كوردستانێ رانابیت، وان نه‌ڤێت پێكڤە ژیانا نەتەوەیی و ئاینی ل كوردستانێ هەبیت.
هەموولایەك ئاگه‌هدار دكەین کو بەردەوامیدان ب ڤى شێوێ مامەلەكرنێ ل گەل هەرێما كوردستانێ ب گشتی و هەولێرا پایتەخت ب تایبەتی، ئاكامێن باش نابن و ئیراق چەند نه‌سەقامگیر و ل هەموو واراندا تووشی ئالۆزی و تەنگەژەیان بوویە، ئەڤ كریارێن تیرۆریستى دێ زێده‌تر نه سەقامگیری و ئارامیێ دروست كه‌ن.
سەرەرای پشته‌ڤانییا مه یا ته‌مام بۆ حكومەتا هەرێما كوردستانێ و هه‌موو سازى و دەزگه‌هێن بەرگری و ئەمنی، ئه‌م رادگەهینین كو هه‌موو سەركردایەتی و كادر و ئەندامێن مه بۆ پاراستنا قەوارێ هەرێما كوردستانێ و پایتەختێ هەرێمێ وەك چاوا ل ده‌مێ بورى دا شورها پیلایى بووین، ژ نهۆ وێڤه ل سەر هەمان رێباز و باوەڕ دێ پارێزگاریێ ژ قەوارێ ھەرێما کوردستانێ و حكومەتێ و ئاكنجیێن وی كەین.
