پەیڤدارێ رێڤەبەرییا گشتییا گەشت و گوزارێ ل پارێزگەھا دھۆکێ ئاشکراکر کو رێژا ھاتنا گەشتیاران ئەف سالە دزێدەبوونێ دا بوو لێ پشتی قەدەغەیا ھاتن و چوونێ ل باشور و ناڤەراستا عیراقێ ھاتییە راگەھاندن، رێژا ھاتنا گەشتیاران بەر ب کێمبوونێ چوویە.
رێوار محەمەد رەشید، پەیڤدارێ رێڤەبەرییا گشتییا گەشت و گوزارێ ل پارێزگەھا دھۆکێ بۆ خانی نیۆز ئاشکراکر کو ل دووڤ ئامارێن رێڤەبەرییا ناڤبری ل ھەیڤا ئێک یا ئەف سالە ٣٢ ھزار گەشتیاران سەردانا پارێزگەھا دھۆکێ کریە و رۆژ بۆ رۆژێ زێدەبوونێ بوویە، لێ پشتی قەدەغەیا ھاتن و چوونێ ل مووسل و باشورێ عیراقێ ھاتییە راگەھاندن رێژا گەشتیاران کێم بوویە لێ ھەر ب ئێکجاری نەھاتییە راوستاندن.
رێوار محەمەد رەشید ئەو ژی گۆت: رۆژێن بوری ژی ھەژمارهکا مەزن یا گەشتیاران سەرهدانا پارێزگەھێ كربوو و ب تنێ ل رۆژا پێنچ شەمبی یا بوری ١٥٠٠ گەشتیاران د ئێک رۆژ دا سەردانا پارێزگەھێ کربوون، وەک رێڤەبەرییا گەشت و گوزارێ پابەندی ب ھەر بریارەکا وەزارەتا ساخلەمی و وەزارەتا ناڤخوە ل حوکمەتا ھەرێما کوردستانێ دەردکەت، چونكى پاراستنا گیانێ وەلاتییان و گەشتیاران بۆ مە ژ ھەر تشتەکی گرنگترە.
پێشتر ژى لژنا بلند یا رووبرووبوونا كۆرۆنایێ ل ھەرێما کوردستانێ بریارا قەدەغەیا ھاتنا گەشتیاران ژ باژێرێن خوار و ناڤەراستا ئیراقێ دایە، ههر چهنده وان چ راوێژ ب دەستەیا گەشت و گوزاریا ھەرێمێ نه كرییه.
نادر روستی پەیڤدارێ دەستەیا گشت و گۆزاری د داخویانییەکا رۆژنامەڤانی دا دیار كر: بریارا قەدەغەیا ھاتنا گەشتیاران بۆ ھەرێما کوردستانێ دێ زیانەکا مەزن گەھینیتە کەرتێ گەشتیاری و ئابووری ل ههرێمێ، لهورا د شیان دا بوو ل جھێ بریارا قەدەغەیا ھاتنا گەشتیاران، پێرابوونێن ساخلەمیێ و جۆرێ خوه پاراستنێ ل سەر وەلاتییان توندتر کربان، چونکى ئەو بریارە دێ زیانێ گەھینیتە کەرتێ گەشتیاریێ ل ههرێما كوردستانێ.
