توركیا دێ پارته‌كا شوونگر بۆ هه‌ده‌پێ دامه‌زرینیت

ژێده‌ره‌كێ نووچه‌یێن توركى راگه‌هاند، ده‌ستهه‌لاتا توركیا بزاڤان دكه‌ت هه‌ده‌پێ وه‌كى پارته‌كا تیرۆرستى ب ده‌ته‌ نیاسن.

رۆژناما جمهوریه‌ یا توركى به‌لاڤكرییه‌، ده‌ستهه‌لاتا توركیا هه‌موو بزاڤان دكه‌ت هه‌ده‌پێ وه‌كى پارته‌كا تیرۆرى بده‌ته‌ نیاسین و بۆ رایا گشتى بده‌ته‌ دیاركرن وێ پارتێ نه‌شیاینه‌ بۆشاییه‌كێ دناڤبه‌را خوه‌ و په‌كه‌كێ دا دروست بكه‌ت له‌وا دێ پارته‌كا دى یا كوردى هێته‌ دامه‌زراندن.

ل گۆره‌ى زانیاریێن رۆژناما جمهوریه‌ به‌لاڤكرین، ده‌ستهه‌لاتا توركیا پشته‌ڤانییا هه‌ردو كه‌سا‌تیێن باكوورێ كوردستانێ ئه‌یهان بیلگه‌ن و ئالتان تانى دكه‌ن كو به‌رى نها هه‌ردو په‌رله‌مانتارێن هه‌ده‌پێ بوون ژبۆ وێ یه‌كێ پارته‌كێ دروست بكه‌ن، ئه‌و هه‌ردو كه‌سا‌تییه‌ ده‌مه‌كێ درێژه‌ ژ هه‌ده‌پێ د تووره‌ نه‌ و ب شێوه‌یه‌كێ نه‌راسته‌ۆخۆ ژى به‌حس ل دروستكرنا پارته‌كا نوو دكه‌ن.

د كۆمبوونێن نهێنى یێن پارتا داد و گه‌شه‌پیدانێ، ئاكه‌پێ دا باس ل وی یه‌كێ هاتییه‌كرن پێدڤى یه‌ فشاره‌كا مه‌زن ل سه‌ر هه‌ده‌پێ بهێته‌ دروستكرن ژبۆ وێ یه‌كێ لاواز ببیت و نه‌شێت سیاسه‌تێ بكه‌ت و ده‌نگێ كوردان ب ده‌ست خوه‌ڤه‌ بینیت، ل به‌رامبه‌ر ژی ئه‌و ل باكوورێ كوردستانێ پارته‌كا نوو وه‌كى شوونگرێ وی دروست بكه‌ن و ده‌نگێن باكوورییان بۆ خوه‌ مسۆگه‌ر بكه‌ن.