ھاتنا گەشتیاران بۆ پاڕێزگەھا دھۆکێ ھاتە قەدەغەکرن

پشتی دەرکەفتنا ھندەک توشبوویێن کۆرۆنا نوو چەندین رێکارێن نوو ھاتنە بجھـ ئینان، ئەوژی قەدەغەکرنا ھاتنا گڕوپێن گەشتیاران بۆ پاڕێزگەھا دھۆکێ ھاتە ڕاگەھاندن و بۆ ماوەیەکێ نەدیار.

رێوار محەمەد رەشید، پەیڤدارێ ڕێڤەبەریا گشتی یا گەشت و گوزارێ ل دھۆکێ تایبەت بۆ خانی نیوز گۆت، پشتی دەرکەفتنا ھندەک توشبوویێن ڤایرۆسێ کۆرۆنا یا نوو ل ھەرێمێ و رێکارێن ساخلەمیێ توندتربووین، و لدووڤ بریارا وەزارەتا ساخلەمی و لژنا بلندا بەرھنگابوونا کۆرونایێ ھاتنا گروپێن گەشتیاری ل پاڕێزگەھا دھۆکێ ھاتە قەدەغەکرن و ئەڤ بریارە ژی بۆ ماوەیەکێ نەدیارە.

رێوار محەمەد دیار ژی کر، ئەو گەشتیارێن سەرەدانا پاڕێزگەھا دھۆکێ دکەن پترییا وان ب شێوێ گروپ دھێن و بۆ ماوێ سێ یان چار ڕۆژان دمینن، داوی گڕوپ ژی کو سەرەدانا دھۆکێ کری ل ڕۆژا پێنج شەمبیا بووری بوو کو ھژمارا وان ژی ۱٥۰۰ گەشتیاربوون، و دوھی ڕۆژا شەمبیێ ٧٢ سەعەت مۆلەت ب وان ھاتە دان کو ڤەگەرنە پاڕێزگەھێن خوە، گۆت ژی: ژنھا و وێڤە ژی گەشتیار دشێن ب ترومبێلێن خوە سەرەدانا دھۆکێ بکەن لێ وەکی گروپ نابیت بھێنە د ناڤا پاڕێزگەھا دھۆکێ دا.

ناڤبری گۆت ژی، پشتی کو ل ھندەک پاڕێزگەھێن ئیراقێ قەدەغەیا ھاتنوچوونێ ھاتییە ڕاگەھاندن ئەڤێ یەکێ ‌تا ڕادەیەکێ کارتێکرن ژ ھاتنا گەشتیاران بۆ پاڕێزگەھا دھۆکێ کر.

ل داویێ ژی گۆت: ھژمارا ھاتنا گەشتیاران بۆ پاڕێزگەھا دھۆکێ بەر ب زێدبوونێ بوو، ئەڤە ژی پشتی وێ یەکێ یە کو تنێ د مەھا بووری دا نێزیکی ۳۲ ھزار گەشتیاران سەرەدانا پاڕێزگەھا دھۆکێ کربوون.

سەعد عاسف، خانی نیوز