نێچیرڤان بارزانى، سه‌روكێ هه‌رێما كوردستانێ ب خێرهاتنا قه‌داسه‌تا پاپاى كر و گۆت: ب ناڤی هه‌موو پێكهاتێن گه‌لێ كوردستانێ ب گه‌رمى ب خێرهاتنا قه‌داسه‌تا هه‌وه دكه‌م، سه‌ره‌دانا هه‌وه روودانه‌كا دیرۆكى یا مه‌زنه و جهێ شه‌ره‌فمه‌ندى و خوه‌شحالییا مه‌یه و شانازییه بۆ هه‌موو گه‌لێ كورد.
گوت ژى: پێكهاتێن كوردستانێ ده‌مه‌كێ درێژه پێكڤه رووبروو دكتاتۆرى و تیرۆرێ بوینه و قۆربانییێن مه‌زن داینه، مه‌سیحى ژى پێكهاته‌كێ ره‌سه‌ن و سه‌ره‌كى یێ كوردستانێ نه و رۆله‌كێ مه‌زن د بنیاتنانا وه‌لاتى دا د گێرن.
نێچیرڤان بارزانى د درێژیا په‌یڤا خوه دا دیاركر؛ وان نه‌ڤێت مه‌سیحى و ئێزدى و هیچ پێكهاته‌یه‌كا دى وه‌لاتى ب جهـ بهێلن.
د دوماهییا گۆتنێن خۆه دا بارزانى گۆت: سه‌ره‌دانا قه‌داسه‌تا هه‌وه دێ به‌ره‌كه‌تێ بۆ هه‌رێما كوردستانێ ئینیت و بۆ هاریكاریا كوردستانێ و پێكهاتێن وێ چاڤێ مه ل پشته‌ڤانییا هه‌وه یه.
ژلایێ خوه ژى ڤه، قه‌داسه‌تا پاپاى سوپاسییا وێ پیشوازییا گه‌رم یا هه‌رێما كوردستانێ كر و راگه‌هاند؛ ده‌مه‌كێ درێژه وان دڤییا سه‌ره‌دانا هه‌رێما كوردستانێ بكه‌ن. سوپاسییا هه‌رێمێ ژى كر كو سه‌ره‌راى وێ یه‌كێ ئه‌و د شه‌رى دا بوون لێ پێشوازى ل ئاوارێن مه‌سیحى یێن مووسل و ده‌شتا نه‌ینه‌وا و قه‌ره‌قوش و پێكهاتێن دى كر.
