د كۆمبوونه‌كا ئۆنلاین دا ل دیوانا پارێزگه‌ها دهۆكێ و ب ئاماده‌بوونا عه‌لى ته‌ته‌ر پارێزگارێ دهۆكێ و هژماره‌كا زۆر ژ رێڤه‌به‌ر و سه‌رۆكێن زانكۆیێن سنورێ پارێزگه‌ها دهۆكێ، رێكه‌فتنا ده‌سته‌خویشكایه‌تیێ د ناڤبه‌را پارێزگه‌ها دهۆكێ و باژێرێ گوینیزڤێل یا ویلاتا فلۆریدا ل ئه‌مریكایێ هاته ئیمزاكرن.
پشتى ئیمزاكرنا رێكه‌فتنێ، عه‌لى ته‌ته‌ر پارێزگارێ دهۆكێ د پریسكۆنفرانسیه‌كێ راگه‌هاند: ئه‌ڤرۆ رێكه‌فتنا ده‌سته‌خوویشكیێ دناڤبهرا دهۆكێ و باژێرێ گوینزڤێل یا وێلایه‌تا فلۆریدایا ئه‌مریكا هاته ئیمزاكرن.
پارێزگارێ دهۆكێ گۆت ژى: مه‌ره‌م ژ ئه‌وێ رێكه‌فتنێ ئه‌وبوو كو دناڤبهرا ڤان دوو باژێران و زانكۆیێن ڤان هه‌ردوو باژێران دا، هه‌روه‌سا دناڤبهرا كارگێرییا هه‌ردوو باژێران دا په‌یوه‌ندیێن دووقولى ل دۆر بابه‌تێن ئابۆرى و گه‌شت و گۆزار و په‌روه‌رده و كولتور و ژینگه‌هـ و شوێنه‌واران بهێنه گرێدان.
گۆت ژى، ئه‌ڤ رێكه‌فتنه دێ بۆ ماوێ پێنچ سالان بیت و سالانه دێ به‌رنامێن خوه دانن و هاریكارى و په‌یوه‌ندیێن دناڤبهرا وان دا دێ بهێزبن.
هه‌ر د ئه‌وێ پرێسكۆنفرانسێ دا عەلی تەتەر پاڕێزگارێ دهۆکێ ڕاگەهاند: ل روژا چارشەمبی ئەو دێ کومبوونەکێ ئەنجامدەن ل دۆر رێکارێن ساخلەمیێ ل پاڕێزگەها و گۆتژی وەکی سازیێن حکومی ئەو دێ ڤان بیرەوەریێن ئادارێ ب بلند نرخینن ب رێیا بەیاننامەیێن فەرمی لێ وەکو ئاهەنگێن جەماوەری چ ئاهەنگ و مەراسیم ناهێنە ئەنجامدان، ژبەر بەلاڤبوونا ڤایرۆسێ کۆرۆنایا نوو.
هەروەسا دەربارەی قەدەغەیا هاتنوچۆنێ ناڤبری راگەهاند، کو هەتا ئەو ل ڕۆژا چارشەمبی کۆمبوونێ ئەنجام نەدەن ئەو نەشێن چ بریاران ل دور ڤێ یەکێ بدەن.
عەلی تەتەر ل داویێ داخاز ژ ولاتییان ژی کر کو رێکارێن ساخلەمیێ بجهـ بینن دا کو د پاراستی بن ژ ڤایرۆسێ کۆرۆنایێ و نەبنە ئەگەرێ وێ چەندێ کو رێکارێن ساخلەمیێ توند ببن لسەر خەلکی.
خانى نیوز، چنار ئه‌حمه‌د
