تورک و فارس ژ پوولێ وەزارەتا ڤەگوھاستنێ نەرازی نە

پەیڤدارێ وەزاەتا دەرڤە یا ئیرانێ نەرازیبوونا وەلاتێ خوە ل دۆر دیزاینکرنا پوولەکێ پاپا فرانیسی کو نەخشەیێ کوردستانا مەزن ل سەر دیار کر و داخوازا راستڤەکرنا وێ کر.
سەعید خەتیب زادە، پەیڤدارێ وەزارەتا دەرڤەیا ئیرانێ د پرێسکۆنفرانسەکی دا راگەھاند، رۆھن و ئاشکرایە ئەو پوولێ بەلاڤ بووی بەرۆڤاژی بنەما و رێکارێن ناڤدەولەتیە.
ل گۆرەی گۆتنا خەتیب زادە، وەلاتێ وی نەرازیبوونا خوە گەھاندیە حکومەتا ئیراقێ و داخوازا چاککرن و راستڤەکرنا بلەز کرییە.
ژ ئالییەکێ دی وەزارەتا دەرڤەیا تورکیا بەیانەک ل دۆر وی پوولی بەلاڤ کر و راگەھاند، د ناڤا وی پوولی دا یێ ب ھەلکەفتا سەرەدانا پاپای ھاتیە دروستکرن وەکو بیرھاتن ھاتییە چاپکرن، لێ وەکو دیار ھندەک پارێزگەھێن تورکیا ژی د وی نەخشەی دا ھەنە.
وەزارەتا دەرڤە یا تورکیا داخوازا رۆھنکرنێ ژ حکومەتا ھەرێمێ کرییە و ئاشکرا کر، ئەو چاڤەرێ نە حکومەتا ھەرێمێ وی پوولی راستڤەکەت و رۆھنگرنەکا پێدڤی بدەت.
ژ ئالیێ خوەڤە جۆتیار عادل، پەیڤدارێ حکومەتا ھەرێما کوردستانێ راگەھاند، ئەو دیزاینا بۆ پوولان دھێتە ھەلبژارتن ل سەر بنەمایێ قانوون و دەستووری دھێتە ھەلبژارتن، ھونەرمەندان چەندین دیزاین پێشکێش کرینە لێ تا نھا چ ژ وان نەھاتینە پەسەندکرن.
پشتی سەرەدانا پاپا فرانسیس بۆ ھەرێما کوردستانێ، چەند پوول ب وێنەیێ پاپای ژ ئالیێ وەزارەتا ڤەگوھاستن و گەھاندنێ ھاتینە بەلاڤ کرن کو نەخشەیێ کوردستانا مەزن ل سەرە، وێ یەکێ ژی تورکیا و ئیران نەرازی کرینە.