حه‌داد: ب زەحمەته‌ رۆژا دووشەمبى بودجه‌ بهێته‌ ده‌ربازكرن

جێگرێ سەرۆکێ پەرلەمانێ ئیراقێ ده‌ربارەی پشکا کوردا د بودجه‌یدا راگەهاند،  هیڤى هه‌نه‌ كو گۆتوبێژ ل سەر بودجەى ب شێوەیەکێ باش و دادپەروەرانە ب رێڤه‌بچیت.

بەشیر حەداد جێگرێ سەرۆکێ پەرلەمانێ ئیراقێ د کۆنفڕانسه‌كێ رۆژنامەڤانى دا راگەهاند: پێدڤییه‌ رونشتنه‌كا تایبەت ل سەر بودجەى بهێته‌ كرن.

جێگرێ سەرۆکێ پەرلەمانێ ئیراقێ ئه‌و چه‌نده‌ ژى ئاشكرا كر، ب زەحمەت رۆژا دووشەمبى، بودجه‌یا ئیراقێ بهێته‌ ده‌ربازكرن، ژبه‌ركو کێشە د یاسایا دادگه‌ها فیدراڵی دا هەیە.

بەشیر حەداد دبێژیت، خاڵا گرنگ ئەوه‌ كو  ئەو چارەسەرییا د ناڤ بودجەیێ یا دادپەروەرانه‌ بێت و د چوارچووڤێ یاسایێ دا بیت، هەر نڤیساره‌كا د ناڤ پرۆژە یاسایێ دا بهێته‌ دانان پێدڤییه‌ یا ده‌ستورى بیت.

ئەڤه‌ د ده‌مه‌كیدایه‌ كو د ناڤ پەرلەمانێ ئیراقێ دا 150 ئیمزا هاتینه‌ كۆمكرن بۆ هندێ رۆژا دووشەمبییا داهاتى بودجەیا 2021 بكه‌نه‌ د خشتەیێ کارێ روونشتنا پەرلەمانى دا و سەرۆکێ پەرلەمانى ژى ب وێ چه‌ندێ رازى بوویه‌.

ژلایێ خۆڤه‌ ژى دوهى په‌یڤدارێ حکومەتا هەرێمێ راگەهاند: چ پێشنیاره‌كا نوو ده‌ربارەی پرۆژەیاسایا بودجەیا 2021ێ یا ئیراقێ بۆ رێککەفتنێ نەگەهشتینه‌ هەرێمێ، پاشى ئەڤڕۆ وه‌سا به‌لاڤبوویه‌، پێشنیاره‌كا نوو بۆ هەرێمێ ده‌ربارەی رێککەفتنێ ل گەڵ ئیراقێ هاتییه‌ كرن .