وەزارەتا ده‌رڤه‌یا ئیرانێ پێشنیارا ڤیزەیا دناڤبه‌را ئیراق و ئیران نه‌مینیت

وەزارەتا ده‌رڤه‌یا ئیرانێ پێشنیازا نه‌مانا ڤیزێ د ناڤبه‌را ئیران و ئیراقێ دا دكه‌ن، جڤاتا وەزیرێن ئیرانێ دێ دانوستاندنێ كه‌ن دا بهێته‌ پەسند كرن.

ل دووڤ مالپه‌رێ ئۆفیسا جڤاتا وەزیرێن ئیرانێ، هه‌ردو وه‌لاتێن ئیران و ئیراق بۆ نه‌هێلانا ڤیزێ رێکه‌فتنا ده‌سپێكێ کرییە، وەزارەتا ده‌رڤه‌یا ئیرانێ پێشنیازا نه‌هێلانا ڤیزێ بۆ جڤاتا وەزیران کرییە. ئەو پێشنیازه‌ نوكه‌ د کۆمیسیۆنا سیاسی و بەرگرییا جڤاتا وەزیرێن ئیرانێ دا دانوستاندن ل سه‌ر دهێته‌ كرن.

ئیرەج مەسجدی، بالیۆزێ ئیرانێ ل ئیراقێ رۆژا 7ی تیرمه‌ها 2020 دیاركربوو،‌ نه‌هێلانا ڤیزێ دناڤبه‌را هەردو وه‌لاتان گاڤه‌كا باشه.

حەسەن رۆحانی، سەرۆککۆمارێ ئیرانێ رۆژا 12ی ئادارا 2019 راگه‌هاندبوو، ڤیزەیا دناڤبه‌را هه‌ردو وه‌لاتان دڤێت بێبه‌رانبه‌ر بیت.

ئیبراهیم رەئیسی، سەرۆکێ دەزگه‌هێ داد یێ ئیرانی، 10 شواتا 2021 سەردانا ئیراقێ کر و دگه‌ل مستەفا کازمی، سەرۆکوەزیرێ ئیراقێ كۆم ببوو و داخوازا ب ساناهیكرنا هاتنوچوونێ دناڤبه‌را هه‌ردو وه‌لاتان كر.

ئیسحاق جەهانگیری، جێگرێ سەرۆککۆمارێ ئیرانێ رۆژا 19ی ئۆکتۆبەرا 2019 گۆت بوو، د ساله‌كێ دا 50 هزار ئیرانیان سەره‌دانا ئیراقێ كرییه‌، به‌لێ د 10 سالێن بوورى ئەڤ هه‌ژماره‌ بۆ سێ ملیۆن و 500 هزار کەسان بلندبوویه‌.

سالانە چەندین ملیۆن وه‌لاتیێن ئیرانێ و ئیراقێ سەره‌دانا هه‌ر دو وه‌لاتان دکه‌ن گه‌له‌ك كه‌س سەره‌دانا مەزارگەهـ و جهێن پیرۆزێن ئایینى دکەن.