سابوونا داهێنه‌ره‌كێ كورد ل‌ 240 دەرمانخانێن جیهانێ دهێته‌ فرۆتن

محەمەد دەدە سابوون فرۆشێ ناڤدار یێ باژێرێ مێردینێ ل باكورێ كوردستانێ و توركیا، ب رێیا بەرهەمهئینانا سابوونێ ناڤدار بوویه‌ و وى دڤێت پارێزگاریێ ل كولتۆرێ باب و باپیرێن خوه‌ بكه‌ت.

ل ناڤا بازارێ باژێرێ مێردینێ، دوكانا وى ناڤوده‌نگێ خوه‌ هه‌یه‌، هه‌ ر ژ سالا  1983 هه‌تا نوكه‌ كار تێدا دكه‌ت و سابوونێ بەرهەم دئینیت.

محەمەد دەدە دبێژیت: ئەو سابوونا ئه‌و بەرهەم دئینیت، 100٪  یا سروشتییە و چ مادده‌یێن كیمیایی تێدا بكار نائینیت، له‌ورا ئه‌و ناڤدار بوویه‌ و خەلك ژى سەره‌دانا وى دكه‌ن.

ئەو ژى گۆتییه‌: ئه‌و سابوونێ بۆ چەندین باژێرێن باكورێ كوردستانێ و توركیا دهنێریت، وى ناڤوده‌نگه‌كێ زۆر پەیدا كرییە، دیسان جۆرێ سابوونا وى هند یا سروشتی و ب مفایه، جاره‌كێ داخواز ژ وى هاتییه‌ كرن ل زانكۆیا ئیسته‌نبۆلێ وانەكێ بێژیت و چاوانییا دروستكرنا ڤێ سابوونێ بۆ وان شرۆڤه‌ بكه‌ت و ئه‌و ژى ب خۆشحالیڤە چوویه‌ و چاوانییا دروستكرنا ڤێ سابوونێ بۆ قوتابییان شرۆڤه‌ كریه‌.

محەممەد دەدە به‌حسێ گرنگییا مێردینێ دكه‌ت بۆ بەرهەمئینانا سابوونێ و دبێژیت:  هەر تشته‌كێ سروشتی ل مێردینێ بێهن هه‌بیت ئه‌و دكه‌ته‌ سابوون، ئه‌و پتر سابوونا كه‌زانان چێدكه‌ت، هه‌روه‌سا باشترین سابوون یا كه‌زانایه‌.